गृह मंत्री अमित शाह शुक्रवार ने सगळा राज्यां रा मुख्यमंत्रियां सागे बात कर र वां ऊं आप-आप रा राज्य मांय पाकिस्तान रा लोगां री पिछाण करण बाबत् कह्यो है। पहलगाम आतंकी हमला पाछे भारत री ओर ऊं पाकिस्तानी नागरिकां ने जारी करी ज्या वीज़ा रद्द करण रा एक दिन पछे ई ओ कदम उठायी ज्यो है। श्री शाह मुख्यमंत्रियां ऊं पाकिस्तानियां री बेगी वापसी तैय करण बाबत् कह्यो। गृह मंत्री आज नई दिल्ली मांय सिंधु जल संधि रा बारा मांय ई जल शक्ति मंत्री सी आर पाटिल अर आला अहलकारां सागे बातचीत कीनी। ध्यानजोग है के भारत पहलगाम हमला मांय पाकिस्तान रो हाथ व्हेवण ने ध्यान राखता थकां सिंधु जल संधि ने निलंबित कर दीनी है। ईं बीचे सेना प्रमुख जनरल उपेन्द्र द्विवेदी आज श्रीनगर पूग्या। वठे फौज रा आला अहलकार जनरल द्विवेदी ने मौजूदा हालात अर आतंकियां रे खिलाफ़ फौज री कार्यवाही री जाणकारी दीनी। वां ने नियंत्रण रेखा माथे हालात रा बारा मांय ई बतायी ज्यो। ध्यानजोग है के आज संवारे लाईन ऑफ कन्ट्रोल-एल.ओ.सी. माथे कठे-कठे पाकिस्तान री ओर ऊं गोलाबारी करी ज्यी, जिण रो भारत रा फौजी असरदार तरीका ऊं जवाब दीनो। जम्मू-कश्मीर रा पहलगाम मांय व्ह्या आतंकी हमला पाछे फौज आतंकियां रे खिलाफ़ ज़ोरदार अभियान चलायो है। हिफ़ाज़ती दस्ता आतंकियां री मौजूदगी री शंका वाळी ठौड़ां री घेराबंदी कर दीनी है अर हेलीकॉप्टरां रे ज़रिये ई निगराणी राख्यी जा रही है। पहलगाम आतंकी हमला रा खिलाफ़ प्रदेश मांय जनता अर न्यारा-न्यारा समूहां री ओर ऊं विरोध प्रदर्शन कर्या जा रह्या है। आज केई ठौड़ां दोपहरां 12 बज्यां तांई दुकानां बंद राख्यी ज्यी। कोटा, झुन्झुनू अर हनुमानगढ़ समेत न्यारी-न्यारी ठौड़ां बाज़ार बंद राख र हमला रे खिलाफ गुस्सो जतायी ज्यो। राजसमंद मांई ई प्रदर्शन कर र ईं कायराना हमला री करड़ी निन्दा करी ज्यी। हमला मांय मरण वाळां ने झुन्झुनू मांय कैण्डल मार्च निकाळ र सिरधाभाव सागे याद करी ज्या। पाली मांय शहर रा खास गेला ऊं मशाल रैली निकाळी जा रही है।