गु्रप कैप्टन शुभांशु शुक्ला समेत चार ई अंतरिक्ष यात्री ऐतिहासिक एक्सियोम-4 मिशन पाछे मंगलवार ने हिफाजत सागे धरती माथे उतर ग्या। इंटरनेशनल स्पेस टेशन माथे 18 दिन रा मिशन पाछे अ अंतरिक्ष यात्री मंगलवार ने दोपहरां अमरीका मांय कैलिफोर्निया तट माथे उतर्या।
प्रधानमंत्री नरेंद्र मोदी श्री शुक्ला अर डै्रगन स्पेस क्राफ्ट री कू्र रा दूजा सदस्यां रो स्वागत करता थकां सोशल मीडिया पोस्ट रे जरिये मांड्यो के श्री शुक्ला वां री हिम्मत अर समर्पण ऊं भारत रा करोड़ां रेहवासियां ने प्रेरित कीना है। श्री मोदी कह्यो के देश रा मानव अंतरिक्ष उड़ान मिशन-गगनयान री दिशा मांय ओ मील रो पत्थर है।
केन्द्रीय विज्ञान अर प्रौद्योगिकी मंत्री जितेन्द्र सिंह ग्रुप कैप्टन शुभांशु री अंतरिक्ष यात्रा कामयाबी सागे पूरी व्हेवण माथे खुशी जाहिर करता थकां इण ने देश सारू अद्भुत लम्हो बतायो।
अंतरिक्ष यात्रा ऊं पाछा आया चार ई जणा ने अब एक हफ़्ता तांई न्यारा राख्या जावेला। शुभांशु शुक्ला रे 17 अगस्त ने दिल्ली पूगण री उम्मीद है। ग्रुप कैप्टन शुक्ला अंतर्राष्ट्रीय अंतरिक्ष स्टेशन जावण वाळा भारत रा पहला रेहवासी अर साल 1984 मांय अंतरिक्ष मांय ग्या विंग कमांडर राकेश शर्मा पाछे भारत रा दूजा अंतरिक्ष यात्री है। शुभांशु शुक्ला अंतरिक्ष केन्द्र मांय खास सूक्ष्म-गुरुत्वाकर्षण प्रयोग कीना।