गुरूवार ने 11वां राष्ट्रीय हथकरघा दिवस मनायी ज्यो। भारत री समृद्ध हथकरघा विरासत ने बचावण सारु ओ दिन मणायो जावे है। ईं मौके प्रधानमंत्री नरेन्द्र मोदी जनता ने शुभकामनावां दीनी है। सोशल मीडिया पोस्ट रे जरिये श्री मोदी कह्यो के ओ दिन भारत री समृद्ध बुनाई परंपरावां रो उत्सव मनावण रो है, जो जनता नी रचनात्मकता रो दरसाव करे है। ईं मौके वस्त्र मंत्रालय री ओर ऊं नई दिल्ली मांय राख्यी ज्या खास कार्यक्रम मांय केंद्रीय कपड़ा मंत्री गिरिराज सिंह हाथ री कारीगरी ऊं बण्या सामान ने दुनिया मांय लोकप्रिय बणावण री अरज कीनी। वे कह्यो के कपड़ा मंत्रालय देश रा बुनकरां ने बचावण सारु काम कर रह्यो है। श्री सिंह कह्यो के मौजूदा दौर री दुनिया मांय गुणवत्तार्पूण कपड़ां री मांग है अर भारत रो हथकरघा उद्योग ईं ज़रुरत ने पूरो कर रह्यो है। केन्द्रीय मंत्री बेहतरीन काम करण वाळा बुनकरां, कर्मचारियां अर सामान बणावण वाळी कंपनियां ने संत कबीर हथकरघा पुरस्कार अर राष्ट्रीय हथकरघा पुरस्कार दे र नवाज़ा। राज्य मांय ई राष्ट्रीय हथकरघा दिवस रे मौके न्यारा-न्यारा कार्यक्रम राख्यी ज्या। जयपुर रा इंदिरा गांधी पंचायत भवन मांय बुनकर सेवा केन्द्र री ओर ऊं राख्यी ज्या कार्यक्रम मांय बुनकर अर हथकरघा हलका ऊं जुड़्या लोग शामिल व्ह्या। ईं मौके हाथ री कारीगरी ऊं बणायी ज्या कपड़ां रो फैशन शो ई राख्यी ज्यो। सवाईमाधोपुर मांय राख्यी ज्या कार्यक्रम मांय बुनकरां ने जरूरी संरक्षण देवण अर वोकल फॉर लोकल रा बारा मांय चर्चा करी ज्यी। ईं मौके केन्द्रीय संचार ब्यूरो रा क्षेत्रीय प्रचार कार्यालय री ओर ऊं नौजवानां ने केन्द्र सरकार कानी ऊं चलायी जा रही जनता रा भला री न्यारी-न्यारी योजनावां रा बारा मांय जाणकारी दीरीजी।