गुरूवार ने अंतर्राष्ट्रीय नषामुक्ति दिवस मनायी ज्यो। ओ दिन मादक पदार्थां ने काम मांय लेवण अर वां री गैर-कानूनी तस्करी रे खिलाफ आयोजित करयो जावे। ईं मौके नुवी दिल्ली रा डॉ. अंबेडकर अंतर्राष्ट्रीय केंद्र मांय कार्यक्रम राख्यी ज्यो। कार्यक्रम मांय सामाजिक न्याय अर अधिकारिता राज्य मंत्री बी.एल वर्मा कयो के अजे तांई देशभर मांय 14 करोड़ ऊं बत्ती लोग नशा मुक्त भारत अभियान ऊं जुड़ चुक्या है। वणा कयो के 4 लाख ऊं बत्ती शैक्षणिक संस्थान ई ईं अभियान मांय मदद कर रिया है।
अंतरराष्ट्रीय नशामुक्ति दिवस कार्यक्रम रो राज्य थर रो कार्यक्रम जयपुर रा इंदिरा गांधी पंचायतीराज संस्थान मांय राख्यी ज्यो। कार्यक्रम मांय सामाजिक न्याय अर अधिकारिता मंत्री अविनाश गहलोत कयो के समाज ने नशा मुक्त राखण री जिम्मेदारी सरकार अर संस्थावां री ई नी है, बल्कि समाज रा हर मिनख री ई है। वणा कयो के हर मिनख ने आरे-सारे रा लोगां मांय नशा मुक्ति रा बारा मांय जाग लावण अर नषा री गिरफ्त मांय जकड़ी ज्या लोगां ने बारे निकाळण रो संकल्प लेवणो व्हेला।
सामाजिक न्याय मंत्री बतायो के प्रदेश मांय ई साल बजट मांय श्रीगंगानगर, हनुमानगढ़, जैसलमेर अर बाड़मेर समेत 10 जिलां मांय 25-25 बिस्तर खमता रा नशामुक्ति केन्द्र सरू करी ज्या है।
ई बीचे, प्रदेष मांय नषामुक्त पखवाडा रे तैत गुरूवार मांय ई न्यारा-न्यारा कार्यक्रमां री मार्फत लोगां ने जागरुक करी ज्या। जैसलमेर मांय बीएसएफ कानी ऊं सरहदी गांव बाहला मांय कार्यक्रम व्हीयो। इण मांय बीएसएफ रा अहलकारां गांव वाळां ने नषा रा कुप्रभाव रा बारा मांय बताया। पाली मांय चिकित्सा महकमा अर जिला विधिक सेवा प्राधिकरण कानी ऊं बांगड अस्पताल मांय कार्यक्रम व्हीयो। कोटपूतली-बहरोड़ जिला मांय ई कार्यषाला राख्यी ज्यी अर रैली री मार्फत लोगां ने नषा रा नुकसाण समझायी ज्या। डीग मांय समाज कल्याण महकमा कानी ऊं कार्यक्रम व्हीयो। ईं मौके नषा छोड़ चुक्या नौजवानां ने बधावो दीरी ज्यो। डीग रा समाज कल्याण अहलकार कुलदीप सिंह बतायो के अभियान ने भरपूर समर्थन मिल रियो है।
भरतपुर मांय बाल अधिकारिता महकमा कानी ऊं ई-साइकिल रैली निकाळी ज्यी। इण री मार्फत लोगां ने नषा रा दुष्प्रभाव री जाणकारी दिरायी ज्यी। श्रीगंगानगर मांय एनसीसी री 15वीं राज बटालियन कानी ऊं रैली निकाळी ज्यी।