गुरूपूर्णिमा रे मौके गुरूवार ने प्रदेशभर मांय गुरूवंदन कार्यक्रम राख्या जा रिया है। न्यारा-न्यारा जिलां मांय धर्म गुरूआं रो सम्मान करयो जा रियो है। कार्यक्रम मांय राज्य सरकार रा मंत्री, विधायक, जिला कलेक्टर या वां रे कानी ऊं नामित अहलकार मौजूद रह र गुरूजनां रो सम्मान कर रिया है। इण मौके माथे मुख्यमंत्री भजनलाल शर्मा आज भरतपुर रा लुधावई रा हनुमान मिन्दर रा संत रो पूजन कर वंदन करया। इण सूं पैली वणा डीग जिला रा पूंछरी का लौठा मांय ई संतां रो सम्मान कर्या। इण मौके वणा प्रदेशवासियां ने गुरू पूर्णिमा री बधाई दी। वे कया के गुरू जिन्दगी मांय प्रेरणा देबा रे सागे रास्तो भी दिखावे है। श्री शर्मा श्रीनाथ जी मिन्दर परिसर मांय पेड़ लगा र पर्यावरण ने बचाबा रो संदेश दियो। देवस्थान महकमा रा मंत्री जोराराम कुमावत अर भाजपा प्रदेश अध्यक्ष मदन राठौड़ पाली मांय गुरू वंदन कार्यक्रम मांय भाग लीना। डूंगरपुर रा बेणेश्वर धाम मांय बड़ी संख्या मांय श्रद्धालु देव दर्शन खातर पूग्या। संत मावजी री जन्म री ठोड साबला मांय भजन कीर्तन राख्या गया। जैसलमेर रा प्राचीन गजरूप ठिकाना, बाईजी आश्रम समेत मठां मांय हवन राख्यो गयो। अठे सुंवारे सूं ही बडी संख्या मांय भक्त दर्शनां खातर आ रिया है। म्हाका भरतपुर खबरनवीस रे मुजब भरतपुर मांय न्यारा-न्यारा आश्रम अर मठां मांय गुरू वंदन करयो जा रियो है। सिंज्या ने भंडारा अर प्रसादी रा कार्यक्रम व्हेला।