गणेश चौथ बुधवार ने सिरधा अर भक्तिभाव सागे मनायी ज्यी। संवारे ऊं ई मिन्दरां मांय भक्तां री लेणां निजर आवण लागी। न्यारी-न्यारी ठोड़ां शोभा यात्रावां ई निकाळी जा रही है। घरां अर पाण्डालां मांय गणपति स्थापना करी ज्यी। ईं सागे ई दस दिन तांई मणायो जावण वाळो गणेशोत्सव सरू व्हे ग्यो। ईं मौके प्रधानमंत्री नरेन्द्र मोदी वां रा संदेश मांय ओ पावन मौको सगळा सारू मंगलकारी व्हेवण अर सगळां री जिन्दगी मांय कोई अड़चन नी आवण री कामना कीनी।
मुख्यमंत्री भजनलाल शर्मा जयपुर रा मोती डूंगरी गणेश मिन्दर मांय विधि-विधान सागे पूजा-अर्चना कर र प्रदेश मांय समृद्धि अर खुशहाली री कामना कीनी। मुख्यमंत्री कह्यो के प्रदेश मांय ईं दफ़ा चोखो मेह व्हेवण ऊं राज्य हरियाळो राजस्थान ओड़ी बढ़ रह्यो है।
सवाईमाधोपुर रा त्रिनैत्र गणेश मेळा मांय ई संवारे ऊं ई जातरू पूगण लाग्या। चूरू रा गणेश मिन्दरां मांय ई दर्शन सारू लम्बी लेणां निजर आयी। डूंगरपुर, कोटपूतली-बहरोड, अजमेर अर हनुमानगढ समेत केई ठोड़ां भक्तां रो उमाव निजर आ रह्यो है। राजसमंद मांय ई गणेश मिन्दरां ने खास तौर ऊं सजायी ज्या है। म्हाणा खबरनवीस बतायो के वठै अरविंद स्टेडियम मांय बुधवार ने गणेश उत्सव सरू व्ह्यो। ईं दफा गणेश चौथ ऊं पैली ई न्यारा-न्यारा संगठनां री ओर ऊं गणेश जी री मिट्टी अर गोबर ऊं बणी मूर्तियां बैठावण री अपील करीजी। अनंत चौदस रा दिन विधि-विधान सागे गणपति विसर्जन कर्यो जावेला।