ख्यातनाम चिंतक अर शिक्षाविद् डॉक्टर श्यामा प्रसाद मुखर्जी री दीतवार ने जयंती है। ई मौके न्यारा न्यारा कार्यक्रम आयोजित करने वां ने श्रद्धांजलि दीरीजी। प्रधानमंत्री नरेन्द्र मोदी सोशल मीडिया संदेश मांय कयो के डॉक्टर मुखर्जी देश रा सन्मान, मर्यादा अर मान री हिफाजत सारू आपरा प्राण न्यौछावर कर्या। वठे ई केंद्रीय सहकारिता मंत्री अमित शाह गुजरात रा आणंद मांय सहकारिता मंत्रालय रा चार साल पूरा होवण माथे राख्यी ज्या जळसा मांय बोलता डॉ. मुखर्जी रा राष्ट्र निर्माण मांय योगदान री सराहना करी। वणा कयो के डॉ. श्यामा प्रसाद मुखर्जी नी व्हेता तो कश्मीर भारत रो अभिन्न अंग नी व्हेतो।
ईं मौके मुख्यमंत्री भजनलाल शर्मा जयपुर मांय आपरा रेहवास माथे जनसंघ रा संस्थापक डॉ. मुखर्जी रा चित्र माथे पुष्प अपर्ण करने श्रद्धाजलि दी। आपरा संदेश मांय वणा श्यामा प्रसाद मुखर्जी ने नमन करता कयो के राष्ट्र री एकता, अखंडता अर संप्रभुता सारू वां रो बलिदान सगळा ने हमेश देश सेवा सारू सीख देवतो रेहवेला। प्रदेश री न्यारी-न्यारी ठोडां डॉ. मुखर्जी री जयंती माथे वां ने श्रद्धा रे साथे याद करी ज्या। राजसमंद मांय मुखर्जी चौराहा माथे डॉ. श्यामाप्रसाद मुखर्जी री मूरत माथे फूल अर्पण करने श्रृद्धांजलि दीरीजी। चूरू, सवाईमाधोपुर, बांसवाडा अर पाली मांय ई डॉ. मुखर्जी री जयंती माथे संगोष्ठी अर श्रद्धाजंलि सभा रो आयोजन करी ज्यो।