केन्द्रीय मंत्रिमंडल कोटा-बूंदी मांय ग्रीन फील्ड हवाई अड्डो विकसित करण री मंजूरी दे दीनी है। प्रधानमंत्री नरेन्द्र मोदी री अगुवाई मांय मंगलवार ने व्ही केन्द्रीय मंत्रिमंडल री मीटिंग मांय ग्रीन फील्ड हवाई अड्डो बणावण रो प्रस्ताव मंजूर करी ज्यो। सूचना अर प्रसारण मंत्री अश्विनी वैष्णव मंगलवार ने नई दिल्ली मांय खबरनीसां ने आ जाणकारी दीनी। वे बतायो के एक हजार पांच सौ सात करोड़ रुप्या रा खर्च वाळी ईं परियोजना मांय बत्ती आवण-जावण री बगत एक हजार मुसाफिरां री आमद-रफ़्त ऊं जुड़्यो बीस हजार वर्ग मीटर हलका वाळो टर्मिनल भवन बणावणो ई शामिल है। श्री वैष्णव कह्यो के हवाई अड्डो बणावण रो काम दो साल मांय पूरो करणो तैय करी ज्यो है, ज्यीं सारू राज्य सरकार एक हजार एकड़ ऊं बत्ती ज़मीं मुफ्त मुहैया करावेला। श्री वैष्णव कह्यो के कोटा भणाई-लिखाई अर उद्योगां रो खास केन्द्र है अर ओ हवाई अड्डो बणबा ऊं क्षेत्रीय जुड़ाव, माली विकास अर सैर-सपाटा ने बधावो मिलेला। वे बतायो के मंत्रिमंडल ओडिशा मांय आठ हजार तीन सौ सात करोड़ रुप्या ऊं बत्ती रकम रा खर्च वाळी छह गेलां ऊं जुड़ी राजधानी क्षेत्र नियंत्रित रिंग रोड़ बणावण री ई मंजूरी दे दीनी।