केन्द्र सरकार रा कर्मचारियां सारु मंहगाई भत्ता अर पेंशन लेवण वाळां सारू महंगाई राहत मांय तीन फीसदी बधोतरी रो फैसलो करी ज्यो है। केन्द्रीय मंत्रिमंडल री आज नई दिल्ली मांय व्ही मीटिंग मांय ओ फैसलो करी ज्यो। मंत्रिमण्डल री मीटिंग पाछे सूचना अर प्रसारण मंत्री अश्विनी वैष्णव आ जाणकारी दीनी। वे बतायो के इण ऊं केंद्र सरकार रा करीब 49 लाख बीस हजार कर्मचारियां अर पेंशन लेवण वाळा 68 लाख 70 हजार जणां ने फायदो व्हेला। आ बधोतरी ईं साल एक जुलाई ऊं लागू व्हेला। श्री वैष्णव बतायो के मीटिंग मांय दाळां री उपज बधावण ऊं जुड़ी आवता छह महीनां री योजना ने ई मंजूरी दीरीजी। वे बतायो के रबी सीजन री छह साखां रा सरकारी मोल मांय बधोतरी रो ई फैसलो करी ज्यो। मंत्री कह्यो के देशभर मांय 57 नुवा केंद्रीय विद्यालय खोलण रो फैसलो ई करी ज्यो। श्री वैष्णव बतायो के केंद्रीय मंत्रिमंडल दलहन री उपज रा मामला मांय खुद रे पाण ऊबा व्हेवण सारू आत्मनिर्भरता मिशन ने ई मंजूरी दीनी। आत्मनिर्भरता मिशन 2025-26 ऊं 2030-31 तांई चलायो जावेला, ज्यीं माथे 11 हजार 4 सौ 40 करोड़ रुप्या रो खर्च आवेला। मंत्री बतायो के मीटिंग मांय विपणन सत्र 2026-27 सारू सगळी ज़रूरी रबी साखां रा सरकारी मोल मांय बधोतरी री मंजूरी ई दीरीजी। सब ऊं बत्ती बधोतरी कुसुम सारू 600 रुप्या प्रति क्विंटल री करी ज्यी जदके मसूर रा सरकारी मोल मांय 300 रुप्या प्रति क्विंटल री बधोतरी करण री मंजूरी दीरीजी।