केन्द्रीय सामाजिक न्याय अर अधिकारिता राज्य मंत्री रामदास अठावले कह्यो है के सरकार समाज रा सगळा तबकां रो विकास करण अर सगळां ने न्याय देवणो तैय कीनो है। वे सोमवार ने जयपुर मांय प्रदेश रा सामाजिक न्याय अर अधिकारिता मंत्री अविनाश गहलोत सागे महकमा रा अहलकारां सागे राख्यी ज्यी मीटिंग मांय बोल रह्या हा। अठावले कह्यो के देश मांय प्रधानमंत्री जनधन योजना रा तैत 56 करोड़ ऊं बत्ता खाता खोली ज्या है, ज्यां मांय राजस्थान रा पौने चार करोड़ खाता शामिल है। वे कह्यो के प्रधानमंत्री मुद्रा योजना रा तैत ई राजस्थान मांय दो करोड़ 34 लाख ऊं बत्ता लोगां ने फायदो दियो ज्यो है। केन्द्रीय मंत्री कह्यो के सरकार कानी ऊं पिछाड़ी तबका री जनता रा भला सारू चलाया जा रह्या कार्यक्रमां रो फायदो समाज रा आखिरी छोर री जनता तांई पूगणो चाहिजे। श्री अठावले मीटिंग मांय महकमा कानी ऊं चलायी जा रही न्यारी-न्यारी योजनावां रा काम रो जायज़ो लीनो। ईं पाछे खबरनवीसां सागे बातचीत करता थकां वे भारत अर पाकिस्तान बीचे क्रिकेट मैच री विपख कानी ऊं आलोचना करण ने बेबुनियाद बताता थकां कह्यो के खेल मांय सियासत नी व्हेवणी चाहिजे। केन्द्रीय मंत्री कह्यो के विपख कने कोई मुद्दो नी है, ईं कारण वो बेकार मसलां ने मुद्दा बणावण री कोशिश करे है।