केन्द्रीय पर्यावरण, वन अर जलवायु परिवर्तन मंत्री भूपेंद्र यादव आस जतायी है के भारत री सर्कुलर इकोनॉमी साल 2050 तांई 2 ट्रिलियन डॉलर ने पार कर सके है, जिण ऊं करीब 10 मिलियन नौकरियां पैदा व्हेवण रा आसार है। वे जयपुर मांय चाल रह्या एशिया और प्रशांत क्षेत्र मांय 12वां क्षेत्रीय थ्री आर अर सर्कुलर इकोनॉमी फोरम रा मंगलवार ने दूजा दिन रा एक सत्र मांय बोल रह्या हा। आवास अर शहरी विकास मंत्रालय रा सचिव श्रीनिवास कटिकिथला खबरनवीसां सागे बातचीत करता थकां बतायो के बधता शहरां अर विकास सागे साधन काम लेवण मांय बधोतरी व्ही है, ज्यीं कारण ऊर्जा अर पाणी समेत दूजा साधनां ने ओजू काम लेवणो जरूरी व्हे ग्यो है। वे कह्यो के फोरम मांय शिरकत करण वाळा सहभागियां री सहमति ऊं जयपुर डिक्लेरेशन रो मजमून तैयार कर्यो जा रह्यो है।