केन्द्रीय मंत्री अर अलवर सांसद भूपेन्द्र यादव दीतवार ने नीमराणा मांय 111-ए स्टेट हाईवे री नीव राखी। इण मांय करीब 50 करोड़ रिप्यां री लागत सूं 48 किलोमीटर लम्बी सड़क बणायी जावेला। इण सूं 11 गांवां ने बेहतर सड़क सुविधा मुहैया व्हेला। यो हाई-वे नीमराणा सूं सरू व्हे र नागौड़ी घिलोट, डाबड़वास, चावंडी होता व्ह्या हरियाणा तांई जावेला। इण मौके केन्द्रीय मंत्री भूपेन्द्र यादव कह्या के इण सूं एक और जठे उद्योगां ने बेहतर कनेक्टिविटी मिलेला वठे ही आमलोगां ने सुगम अर सुरक्षित परिवहन सुविधा मिलेला। वणा कह्या के देश ने आगे बढ़ाबा खातर आवती पीढ़ी तैयार करणो सगळा री जिम्मेदारी है।