केन्द्रीय मंत्रिमंडल साल 2027 मांय व्हेवण वाळी जनगणना सारू 11 हजार 718 करोड़ रुप्या रो बजट मंजूर कीनो है। सूचना अर प्रसारण मंत्री अश्विनी वैष्णव शुक्रवार ने नई दिल्ली मांय व्ही मंत्रिमण्डल री मीटिंग पाछे खबरनवीसां ने आ जाणकारी दीनी। वे बतायो के देश री 16वीं अर आज़ादी पाछे री 8वीं जनगणना दो दौर मांय कराई जावेला। श्री वैष्णव कह्यो के ईं रा तैत जातिगत गणना ई करायी जावेला। मंत्री कह्यो के आ पहली डिजिटल जनगणना व्हेला, ज्यीं रा तैत एंड्रॉइड अर आई ओ एस मोबाइल एप्लिकेशन रे ज़रिये जाणकारियां भेळी करी जावेला। वे बतायो के जनगणना रा काम मांय तीस लाख कर्मचारियां ने लगाया जावेला। जनगणना 2027 रा तैत जनगणना कर्मी हर घर तांई पूगेला। श्री वैष्णव ने बतायो के मंत्रिमंडल कोयला संपर्क नीति – कोल सेतु मांय सुधार री मंजूरी ई दे दीनी।