केंद्रीय मंत्रिमंडल नौकरी धंधा ने बधावो देवण ऊं जुड़ी करीब एक लाख करोड़ रुप्या री रोजगार-संबंधी प्रोत्साहन योजना ने मंजूरी दे दीनी है। इण रो मकसद आवता दो साल मांय देश मांय साढे तीन करोड़ ऊं बत्ती नौकरियां पैदा करण ने बधावो देवणो है। आं मांय एक करोड 92 लाख जणा पहली दफ़ा नौकरी हासिल करण वाळा व्हेला। आ योजना एक अगस्त 2025 ऊं 31 जुलाई 2027 बीचे लागण वाळी नौकरियां माथे लागू व्हेला। केन्द्रीय मंत्री अश्विनी वैष्णव मंगलवार ने नई दिल्ली मांय व्ही मंत्रिमंडल री मीटिंग मांय लिया ज्या फैसलां रा बारा मांय खबरनवीसां ने जाणकारी दीनी। वे बतायो के ईं योजना रा तैत पहली दफ़ा नौकरी लागण वाळा कर्मचारियां ने एक महीना री तनख्वाह 15 हजार रूप्या तांई मिलेला। ईं रे जरिये विनिर्माण हलका माथे खास ध्यान दियो जावेला।
कैबिनेट एक लाख करोड़ रुप्या रा खजाना सागे अनुसंधान विकास अर नवाचार योजना ने ई मंजूरी दे दीनी। ईं योजना रो मकसद देश मांय रिसर्च अर डवलपमेंट रा ईको सिस्टम ने मज़बूत बणावणो है। मंत्रिमंडल राष्ट्रीय खेल नीति 2025 ने ई मंजूरी दे दीनी है। श्री वैष्णव बतायो के नुवी खेल नीति ऊं खेलां ऊं जुड़्या बुनियादी ढांचा ने और बेहतर बणायो जावेला। ईं सागे ई प्रतिभावां री पिछाण कर र वां ने सिखावण देवण माथे जोर दियो जावेला। इण ऊं अंतर्राष्ट्रीय आयोजनां सारू भारत री मज़बूत दावेदारी ई पेश करी जा सकेला।