केन्द्रीय गृह मंत्री अमित शाह दीतवार ने कोटपूतली-बहरोड़ ज़िला रा पावटा मांय धार्मिक समारोह मांय शामिल व्ह्या। वणा बावड़ी रा बाबा बालनाथ री तप री ठौड़ माथे राख्या 108 कुंडीय रूद्र महामृत्युंजय महायज्ञ री पूर्णाहुति मांय भाग लीना। श्री शाह सनातन धर्म सम्मेलन ने भी सम्बोधित कर्या। वे कह्या के बाबा बालनाथ जनकल्याण, पशु-पक्षियां री सेवा, पर्यावरण संरक्षण अर सामाजिक समरसता खातर काम कर्यो, जिण ने वां रा अनुयायी लगातार आगे बढ़ा रिया है। केन्द्रीय मंत्री कह्या के नाथ संप्रदाय सनातन धर्म ने मजबूत करबा रो काम कर्यो है। परंपरा अर आध्यात्म सूं जुड़्या इण धार्मिक आयोजन मांय राजस्थान समेत न्यारा-न्यारा राज्यां सूं बडी संख्या मांय सिरधालू शामिल व्ह्या। मुख्यमंत्री भजनलाल शर्मा समारोह ने सम्बोधित करता थकां कह्या के सरकार धार्मिक ठौड़ां रा विकास खातर राज्य बजट मांय केई ऐलान करी है। केंद्रीय मंत्री भूपेंद्र यादव, जयपुर ग्रामीण सांसद राव राजेंद्र अर केई विधायक इण कार्यक्रम मांय मौजूद रह्या।