केन्द्रीय गृह अर सहकारिता मंत्री अमित शाह कह्यो है के सहकारिता रो देश रा विकास मांय मोटो योगदान है। श्री शाह गुरूवार ने जयपुर कने दादिया गांव मांय राख्यी ज्या सहकारिता अर रोजगार उत्सव मांय बोल रह्या हा। सहकारिता मंत्री कह्यो के आवता 100 साल सहकारिता रा व्हेला। वे कह्यो के देश रा गांवाई हलकां मांय साढे आठ लाख सहकारी समितियां रे मार्फत 31 करोड़ लोग सहकारिता ऊं जुड़ चुक्या है। वे कह्यो के राजस्थान रो देश री खेती बाड़ी रा विकास मांय मोटो योगदान है। केन्द्रीय सहकारिता मंत्री कह्यो के ग्वार, सरसों, बाजरा अर मोटा री उपज लेवण मांय राजस्थान देश मांय अव्वल है। कार्यक्रम मांय मुख्यमंत्री भजन लाल शर्मा कह्यो के किसानां ने उपज रो उचित मोल दिरावण, महिलावां अर नान्हा कारोबारियां ने मजबूत बणावण मांय सहकारिता रो खास काम है। श्री शर्मा सगळां ऊं सरकारी योजनावां रो फायदो हर एक जणा तांई पूगावण री अपील कीनी। जळसा मांय केन्द्रीय मंत्री अमित शाह सहकारिता रा हलका मांय न्यारी-न्यारी योजनावां अर बुनियादी सुबीतां री सरूआत कीनी। वे अन्नभंडारण योजना रा तैत 24 गोदाम अर श्रीअन्न ने बधावो देवण सारू मोटा अनाज री 64 दुकानां जनता ने सूंप्या। श्री शाह गोपाल क्रेडिट कार्ड योजना रो फायदो लेवण वाळा 1 हजार 400 जणां ने 12 करोड़ रुप्या रा कर्ज दीना अर दुग्ध उत्पादक सहकारी समितियां ने 2 हजार ऊं बत्तो माइक्रो एटीएम सूंप्या। श्री शाह श्वेत क्रांति 2.0 पीडीसीएस ऑनलाइन रजिस्ट्रेशन प्लेटफॉर्म री सरूआत ई कीनी। वे पुलिस थाणां, हथियारबंद टुकड़ियां, टु्रप कैरियर अर सिखावण रा काम आवण वाळी एक सौ नुवी गाड़ियां ने झंडी बता र रवाना कीनी। केन्द्रीय मंत्री ईं मौके आठ हजार ऊं बत्ता नौजवानां ने नौकरी लागण रा कागज़ात सूंप्या। न्यारा-न्यारा ज़िलां मांय ई सहकार अर रोज़गार उत्सव राख्यी ज्या।