केन्द्रीय कोयला अर खान मंत्री जी. किशन कह्यो है के राजस्थान मांय बेगा ई लीथियम ब्लॉक्स री पिछाण करी जावेला। श्री रेड्डी सोमवार ने जयपुर मांय राख्यी ज्या खान मंत्रालय रा रेटिंग पुरस्कार समारोह मांय बोल रह्या हा। वे कह्यो के बेगा ई ब्लॉक्स री नीलामी कर र जमीं हेटे ऊं लीथियम री खुदाई सरू करी जावेला। खबरनवीसां सागे बातचीत करता थकां श्री रेड्डी कह्यो के क्रिटिकल मिनरल्स री दिसावर ऊं मंगायी जावण वाळी तादाद कम करण बाबत् काम करणो व्हेला।
समारोह मांय केन्द्रीय कोयला अर खान मंत्री कह्यो के खनन हलका रो विकास अर रोजगार ने बधावो देवण मांय मोटो काम है। वे कह्यो के ईं सागे ही खानां मांय मजूरां री हिफाजत अर वां रा भला रा कामां माथे ई पूरो ध्यान दियो जावणो चाहिजे।
ईं मौके मुख्यमंत्री भजनलाल शर्मा कह्यो के सरकार जमीं हेटे ऊं खुदाई अर पर्यावरण बीचे तालमेल माथे खास ध्यान दे रही है। वे निवेशकां ने न्यौतो देता थकां कह्यो के राज्य मांय खान हलका मांय घणी संभावनावां है। मुख्यमंत्री कह्यो के प्रदेश मांय 82 भांत रा धात्विक अर अधात्विक खनिज है, ज्यां मांय ऊं 57 भांत रा खनिज ज़मीं हेटे ऊं निकाळ्या जा रह्या है।
कार्यक्रम मांय पांच सितारा रेटिंग वाली 95 अर सात सितारा रेटिंग वाळी तीन खदानां रा नुमाइंदां रो मान करी ज्यो। मुख्यमंत्री भजन लाल शर्मा अर केंद्रीय कोयला अर खान मंत्री खान विभाग रा कामकाज रो जायजो लेवण सारू अहलकारां सागे मीटिंग ई कीनी। मुख्यमंत्री रा रेहवास माथे व्ही मीटिंग मांय नीलाम करी ज्या ब्लॉक्स ऊं खुदाई रो काम बेगो ई सरू करण अर नुवा खनिज ब्लॉक्स री पिछाण करण समेत न्यारा-न्यारा मुद्दां माथे चर्चा करीजी।