केन्द्रीय कौशल विकास अर उद्यमिता राज्यमंत्री जयंत चौधरी मंगलवार ने जोधपुर मांय केई कार्यक्रमां मांय शामिल व्ह्या। श्री चौधरी लूणावास भाखड़ गांव मांय भर रह्या तेजाजी रा मेळा मांय शामिल व्ह्या। ईं दौरान व्ही सभा मांय वे कह्यो के राजस्थान कलाकारां अर शिल्पकारां री धरती है अर वां रा हुनर ने दुनियाभर मांय पिछाण दिरावण री कोशिशां करी जावेला। वे नौजवानां ऊं कौशल विकास अर एआई तकनीक ऊं जुड़बा री अपील कीनी। श्री चौधरी खेजड़ली शहीद मेळा मांय ई भाग लीनो। वे कह्यो के पर्यावरण ने बचावण अर जीवां माथे दया करणे वठे रा लोगां री ओळखाण है। ईं मौके केन्द्रीय पर्यटन अर संस्कृति मंत्री गजेन्द्र सिंह शेखावत ई मौजूद रह्या। वे अमृता देवी ने नमन करता थकां कह्यो के जीव दया रो संदेश नुवी पीढ़ी तांई पूगावण री म्हां सगळां री ज़िम्मेदारी है। केन्द्रीय मंत्री राष्ट्रीय लोकदल रा कार्यकर्ता सम्मेलन मांय ई हिस्सो लीनो।