केंद्रीय कृषि मंत्री शिवराज सिंह चौहान कह्यो है के नकली बीज अर नकली दवाइयां बेचण वाळां माथे काबू करण सारू बेगो ई कानून बणायो जावेला। श्री चौहान मंगलवार ने नागौर जिला रा मेड़ता मांय राख्यी ज्या राज्य स्तर रा किसान सम्मेलन मांय बोल रह्या हा। श्री चौहान कह्यो के प्रधानमंत्री आवास योजना रा तैत 15 हजार रुप्या तांई री आमदनी वाळां ने ई मकान दियो जावेला। वे राज्य मांय प्रधानमंत्री ग्राम सड़क योजना सारू 2 हजार करोड़ रूप्या ऊं बत्ती रकम री मंजूरी ई दीनी। वे कह्यो के ईं योजना री न्यारी-न्यारी शर्तां मांय छूट दी जावेला। श्री चौहान कह्यो के सरकार प्रधानमंत्री फसल बीमा योजना री कमियां आगी करण री कोशिश कर रही है।
केंद्रीय मंत्री कह्यो के विकसित भारत जी राम जी योजना मांय मजूरां रा भला अर किसानां रो ध्यान राख्यी ज्यो है। वे कह्यो के ईं बारा मांय फैलाई जा रहीं नकारात्मक बातां बेबुनियाद है। श्री चौहान कह्यो के सरकार खेती-बाड़ी ने फायदा रो सौदो बणावण माथे खास ध्यान दे रही है। वे कह्यो के फसल खराबा रो उचित मुआवजो देवण मांय मोड़ो करण परां बीमा कंपनियां ने 12 फीसदी ब्याज देवणो व्हेला। वे कह्यो के जंगली जिनावरां रे कारण साखां ने व्हेवण वाळा नुकसाण ने ई बीमा रा दायरा मांय लायो जावेला। कार्यक्रम मांय मुख्यमंत्री भजन लाल शर्मा कह्यो के राज्य सरकार किसानां, नौजवानां, महिलावां अर मजूरां ने आगे बधावण अर मज़बूत बणावण सारू लगातार काम कर रही है।
सम्मेलन मांय खेती-बाड़ी अर उद्यानिकी ऊं जुड़ी न्यारी-न्यारी योजनावां रा तैत मदद री रकम संबंधित लोगां रा खातां मांय भेजी ज्यी। ईं सागे ई नागौर ज़िला मांय 351 करोड़ रुप्या रा खर्च वाळा विकास रा कामां रो उद्घाटन कीनो अर नुवा कामां री सरूआत करी ज्यी।