केंद्रीय शिक्षा मंत्री धर्मेंद्र प्रधान कह्यो है के साल 2047 तांई देश ने विकसित बणावण रो संकल्प पूरो करण मांय नौजवानां ने खास काम करणो है। श्री प्रधान गुरूवार ने अजमेर कने राजस्थान केंद्रीय विश्वविद्यालय रा नौ वां दीक्षांत समारोह मांय बोल रह्या हा। श्री प्रधान कह्यो के आवता 20 साल मांय भारत ने ताकतवर देश बणावणो जनता रो भेळो संकल्प है जो नौजवानां री मेहनत, संकल्प अर जुनून रे पाण ज़रूर पूरो व्हेला। श्री प्रधान कह्यो के दुनिया रा बदलता हालात मांय भारत मोटी ताकत बण र सामी आ रह्यो है। केंद्रीय मंत्री आला दर्जा री स्कूल-कॉलेजां मांय पढ़बा वाळा नौजवानां ऊं नौकरी करण री बजाय कारोबारी बण र दूजा नौजवानां ने ई नौकरी मुहैया करावण री अपील कीनी। वे कह्यो के नौजवानां री सोच मांय बदलाव ऊं ई देश दुनिया री सब ऊं मोटी माली व्यवस्था बण सकेला। श्री प्रधान कह्यो के डिग्री हासिल करणो खास है, पण वां ऊं बत्ती ज़रूरी है होशियारी। ईं कारण ई भणाई-लिखाई ने व्यावसायिक शिक्षा अर कारोबार सागे जोड़ी जा रही है। श्री प्रधान कह्यो के भारत मांय स्कूल-कॉलेजां री गुणवत्ता लगातार सुधर रही है। वे बतायो के साल 2014 मांय भणाई-लिखाई ऊं जुड्या दुनिया रा बेहतरीन 500 संस्थानां मांय भारत रा केवल 11 संस्थान हा, जद के हाल ई आयी रपट रे मुजब आं री तादाद बध र 54 व्हे ग्यी है। मंत्री कह्यो के नुवी शिक्षा नीति रा तैत दूजा देशां रा विश्वविद्यालयां ने ई भारत मांय काम करण री मंजूरी दे दीरीजी है अर हाल तांई 8 विदेशी विश्वविद्यालय काम करणो सरू कर दीनो है अर आवता सत्र तांई आं री तादाद 15 व्हेवण री संभावना है। कार्यक्रम मांय केंद्रीय कृषि राज्य मंत्री भागीरथ चौधरी ई मौजूद रह्या।