केंद्रीय मंत्रिमंडल री बुधवार ने नई दिल्ली मांय व्ही मीटिंग मांय केई खास फैसला करी ज्या। सूचना अर प्रसारण मंत्री अश्विनी वैष्णव खबरनवीसां ने आं फैसलां री जाणकारी देता थकां बतायो के मीटिंग मांय रेल्वे, हाईवे, जहाज बणावण अर विकास री न्यारी-न्यारी परियोजनां ने मंजूरी दीरीजी। श्री वैष्णव बतायो के मंत्रिमंडल रेलवे रा 10 लाख 91 हजार कर्मचारियां ने 78 दिन रा उत्पादकता आधारित बोनस रा तौर ऊँ एक हज़ार 865 करोड़ रुप्या ऊँ बत्ता चुकारां री मंजूरी दे दीनी। कर्मचारियां ने बोनस री रकम दुर्गा पूजा अर दशहरा ऊँ पैली दी जावेला। मंत्रिमंडल भारत रा जहाज बणावण अर समुद्री पारिस्थितिकी तंत्र ने ओजू बेहतर बणावण सारू 69 हजार 725 करोड़ रुप्या रा पैकेज ने ई मंजूरी दे दीनी।