केंद्रीय गृह मंत्री अमित शाह कह्यो है के लारला साल लागू करी ज्या तीन आपराधिक कानूनां ऊं देश मांय तुरत, आसान अर सरल तरीका ऊं न्याय मिलण लाग्यो है। वे नुवा आपराधिक कानूनां रे लागू व्हेवण रो एक साल पूरो व्हेवण रे मौके जयपुर मांय लगायी ज्यी राज्य स्तर री प्रदर्शनी रा उद्घाटन जळसा मांय बोल रह्या हा। श्री शाह कह्यो के अ कानून ईज ऑफ जस्टिस- आसानी ऊं न्याय मिलण री दिशा मांय खास कदम है। गृहमंत्री कह्यो के अ कानून लंबी चर्चा अर केई लोगां रा सुझाव अर मंथन पाछे लागू करी ज्या। श्री शाह आं कानूनां री खासियत रो जिकर करता थकां कह्यो के आं कानूनां मांय महिलावां अर बच्चां रे खिलाफ व्हेवण वाळा अपराधां रा मामलां मांय खास प्रावधान करी ज्या है। श्री शाह कह्यो के आं कानूनां मांय पीड़ित लोगां ने टेमसर न्याय दिरावण रा प्रावधान करी ज्या है। वे कह्यो के अ कानून लागू करणो 21वीं सदी रो सब ऊं खास बदलाव है। श्री शाह जनता ऊं देशी सामान री खरीदी करण री अरज कीनी। वे कह्यो के देशी सामान काम लेवण ऊं देश मांय उत्पादन बधेला, जिण ऊं भरत ने साल 2047 तांई विकसित देश बणावण रो संकल्प पूरो करण मांय मदद मिलेला। श्री शाह कार्यक्रम रे दौरान राजस्थान ग्लोबल इन्वेस्टमेंट समिट 2024 मांय मिल्या निवेश रा प्रस्तावां मांय ऊं 4 लाख करोड़ रुप्या रा करार माथे काम सरु करण सागे करीब 9 हजार 300 करोड़ रुप्या ऊं बत्ता रा विकास रा कामां री नींव रखी अर पूरा व्ह्या काम जनता ने सूंप्या। वे राज्य मांय सरकारी स्कूलां रा विद्यार्थियां ने स्कूल ड्रेस मुहैया करावण सारु 260 करोड़ रुप्या अर दूध उत्पादकां ने दूध सब्सिडी रा 364 करोड़ रुप्या री रकम ई भेजी। कार्यक्रम मांय मुख्यमंत्री भजन लाल शर्मा अर राजस्थान हाई कोर्ट रा कार्यवाहक मुख्य न्यायाधीश न्यायमूर्ति संजीव प्रकाश शर्मा ई मौजूद हा।