केंद्रीय गृह मंत्री अमित शाह कह्यो है के किण ई प्रदेश री तरक्की मांय कानून व्यवस्था रो घणो खास काम व्हे है। श्री शाह आज जयपुर मांय करीब 10 हजार सिपाहियां ने नौकरी लागण रा कागज़ात सूंपण रा कार्यक्रम मांय बोल रह्या हा। वे कह्यो के ज्यीं प्रदेश मांय कानून व्यवस्था चोखी व्हे है वठे निवेशक ई निवेश करण माथे ध्यान देवे है। केन्द्रीय गृह मंत्री कह्यो के राजस्थान मांय चुनौतियां रे बावजूद ई कानून-व्यवस्था माथे खास ध्यान दियो ज्यो है। वे कह्यो के वो प्रदेश अगाड़ी बणे है जठे नौजवानां ने बिना सिफारिश नौकरी दी जावे है। श्री शाह कह्यो के भर्तियां बिना भ्रष्टाचार साफगोई सागे व्हेवणी चाहिजे। गृह मंत्री कह्यो की राज्य री भजनलाल सरकार प्रदेश मांय नौजवानां ने पेपर लीक ऊँ निजात दिलाई है।श्री शाह कह्यो के मुख्यमंत्री भजनलाल शर्मा रा राज मांय प्रदेश मांय अपराधां मांय कुल 14 फीसदी जद के गंभीर प्रकृति रा अपराधां मांय 19 फीसदी री कमी आयी है। भारतीय न्याय संहिता री खासियत रो जिक्र करता थकां श्री शाह कह्यो के नुवा कानून पूरी तरह लागू व्ह्यां पाछे एफ.आई.आर. दर्ज व्हेवण री तारीख ऊँ तीन साल री मियाद मांय सुप्रीम कोर्ट तांई री सुणवाई पूरी व्हे जावेला। केन्द्रीय गृह मंत्री जयपुर री राजस्थान पुलिस अकादमी मांय मल्टीपल इंडोर हॉल रो उद्घाटन कीनो अर चूरू ज़िला रा रतननगर पुलिस थाणा ने सब ऊँ बेहतर थाणा रो सर्टिफिकेट दीनो। कार्यक्रम मांय मुख्यमंत्री भजन लाल शर्मा कह्यो के वां री सरकार पुलिस ने और बेहतर बणावण सारू लगातार कोशिश कर रही है। इण ऊँ पैली केन्द्रीय गृहमंत्री जोधपुर मांय चाल रह्या माहेश्वरी समाज रा राष्ट्रीय अधिवेशन मांय ई शिरकत कीनी।