कार्तिक पूर्णिमा अर देव दिवाळी रे मौके बुधवार ने प्रदेशभर मांय धार्मिक उमाव रो माहौल बण्यो रियो। पुष्कर, कोलायत, बेणेश्वर धाम अर गलता तीर्थ समेत सगळा खास सरोवरां माथे पवित्र स्नान सारू संवारा ऊं ई श्रद्धालुआं रो तांतो लाग्यो रियो। कार्तिक पूर्णिमा रे मौके पंचतीर्थ स्नान रे साथे ई पुष्कर मांय भरीज रियो सालाना मेळो ई विधि पूरण सम्पूरण व्हीयो। म्हाणी अजमेर खबरनवीस बतायो के देश-विदेश ऊं आया दो लाख ऊं बत्ती सिरधालुआं पुष्कर रा 52 घाटां माथे डुबकी लगार पुण्य अर्जन कर्यो। सवाईमाधोपुर मांय रामेश्वर घाट रा त्रिवेणी संगम मांय ई घणी तादाद मां लोग धार्मिक स्नान सारू पूग्या। वठे संगम मांय डुबकी लगार चतुर्भुज नाथ रा दर्शन ने लेर मिन्दरा मांय लाम्बी कतार देखी ज्यी। पाली मांय ई मौके गायां ने रीत मुजब लापसी अर गुड़ खिलार पूजा करी। वठै ई देव दीवाळी रे मौके मन्दिरां अर घरां मांय दीपमालावां सजायी जावे। देव दिवाळी ने देवतावां री दीवाळी मानी जावे है अर दिया जगार देवतावां रे धरती माथे आवण री खुशियां मनायी जावे है। ई मौके केई पवित्र सरोवरां माथे दीपदान रा कार्यक्रम राख्यी ज्या है। डूंगरपुर मांय सापन नदी रे किनारे प्राचीन नीलकंठ महादेव मंदिर मांय बुधवार ऊं तीन दिन रो मेळो भरीजे। मेळा मांय लोकगीतां माथे आदिवासी समुदाय रा लोगां हथियारां रे साथे नाच कर्यो।