कांग्रेस रा राष्ट्रीय अध्यक्ष मल्लिकाजुर्न खड़गे पहलगाम हमला रा बारा मांय कह्यो है के सरकार इण ऊं जुड़्या जो कोई जतन करेला सगळा वां सागे रहवेला। श्री खड़गे सोमवार ने जयपुर रा रामलीला मैदान मांय राख्यी ज्यी संविधान बचाओ रैली मांय बोल रह्या हा। वे कह्यो के देश सब ऊं पैली है। रैली मांय राज्य रा पैली वाळा मुख्यमंत्री अशोक गहलोत, पैली वाळा उपमुख्यमंत्री सचिन पायलट अर कांग्रेस रा प्रदेश अध्यक्ष गोविन्द सिंह डोटासरा ई विचार बताया। कांग्रेस पार्टी री ओर ऊं सोमवार ने लोकतंत्र बचाओ अभियान री औपचारिक सरूआत करी ज्यी। ईं पाछे श्री खड़गे पार्टी रा जिला अध्यक्षां सागे मीटिंग ई कीनी।दूजी कानी प्रदेश भाजपा अध्यक्ष मदन राठौड़ कांग्रेस पार्टी अर वां रा अध्यक्ष माथे ढोंग करण रो आरोप लगायो है। सोमवार ने जयपुर रा प्रदेश भाजपा कार्यालय मांय खबरनवीसा सागे बातचीत करता थकां श्री राठौड़ कह्यो के कांग्रेस पार्टी संविधान री हिफाज़त रो नाटक कर रही है जद के वां रो व्यवहार संविधान रे मुजब नी व्हे है। प्रेस वार्ता ने मंत्री जोगाराम पटेल अर मदन दिलावर ई सम्बोधित कीना।