ऑपरेशन सिंदूर री कामयाबी रो जश्न मनावण सारु प्रदेश मांय न्यारा-न्यारा कार्यक्रम राख्या जा रह्या है। हैं। भारतीय जनता पार्टी री ओर ऊं तिरंगा यात्रा निकाळी जा रही है। गुरूवार ने जयपुर मांय तिरंगा यात्रा निकाळी ज्यी। मुख्यमंत्री भजन लाल शर्मा यात्रा री अगुवाई कीनी। ऐतिहासिक अल्बर्ट हॉल ऊं सरू व्ही आ यात्रा बड़ी चौपड़ जा र पूरी व्ही। रैली मांय शामिल लोग हाथां मांय तिरंगा झंडा ले र देशभक्ति रा नारा लगाया। यात्रा सरु व्हेवण ऊं पैली जनता ने संबोधित करता थकां मुख्यमंत्री भजन लाल शर्मा कह्यो के ऑपरेशन सिंदूर रे दौरान सशस्त्र बल अद्भुत हिम्मत अर वीरता रो दरसाव कीनो। मुख्यमंत्री कह्यो के फौजियां रा मान मांय तिरंगा यात्रा निकाळी जा रही है। भाजपा रा प्रदेश अध्यक्ष मदन राठौड़ कह्यो के तिरंगा यात्रा राज्य रा सगळा विधानसभा हलकां मांय अर ब्लॉक लेवल माथे निकाळी जावेला। वे कह्यो के फौज रा जवान पाकिस्तान ने करड़ो जवाब दीनो।
यात्रा मांय भारतीय जनता पार्टी रा केई नेता, राज्य मंत्रिपरिषद रा सदस्य, धर्मगुरू, रिटायर व्ह्या फौजी, एन.सी.सी. कैडेट अर सामाजिक अर कारोबारी संगठनां रा सदस्य शामिल व्ह्या। ईं सिलसिला मांय प्रदेश रा केई रेलवे टेशनां ने तिरंगी रोशनी ऊं सजायी ज्या है। इंर् सागे ई रेलवे रा न्यारा-न्यारा दफ्तरां माथे ई रोशनी ऊं सोहवणी सजावट करी ज्यी है। फौज री वीर गाथा री जाणकारी देवण सारू टेशनां माथे देशभक्ति रा गीत बजाया जा रह्या है। ऑपरेशन सिंदूर री कामयाबी ऊं जनता मांय ई उमाव है। झालावाड़ मांय न्यारा-न्यारा तबकां रा लोग फौज री सराहवणा कीनी।