भारत मांय आतंक फैलावण वाळां रा पाकिस्तान मांय ठिकाणां माथे कार्रवाई सारु चलायी ज्या ऑपरेशन सिंदूर रा बारा मांय सोमवार ने लोकसभा मांय खास चर्चा व्ही। रक्षा मंत्री राजनाथ सिंह जम्मू-कश्मीर रा पहलगाम मांय करी ज्या आतंकी हमला पादे करी ज्यी ईं कार्रवाई ने भारत मज़बूत, कामयाब अर निर्णायक फौजी कार्रवाई बतायी है। चर्चा री सरुआत करता थकां वे कह्यो के ऑपरेशन सिंदूर देश री संप्रभुता, भारत री ओळखाण, जनता रा प्रति सरकार री ज़िम्मेदारी अर आतंकवाद रे खिलाफ़ भारत री करड़ी नीति रो असरदार अर निर्णायक दरसाव हो। रक्षामंत्री कह्यो के पाकिस्तान री शह ऊं पहलगाम मांय करी ज्या आतंकवादी हमलां रे कारण रिश्तेदारां ने गमावण वाळा निर्दोष पिरवारां ने न्याय दिरावण सारू ऑपरेशन सिंदूर चलायी ज्यो हो। श्री सिंह कह्यो के भारतीय वायु सेना कानी ऊं करी ज्या मोटा हमलां, थलसेना री ओर ऊं करी ज्यी करड़ी जवाबी कार्रवाई अर नौसैना कानी ऊं हमलां रो डर पाकिस्तान ने घुटना टेक देवण माथे मजबूर कर दीनो। वे कह्यो के प्रधानमंत्री नरेन्द्र मोदी अर म्हाणी सरकार रो रुख बिल्कुल साफ़ है के आतंकवाद अर बातचीत एके सागे नी चाल सके है। ईं बीचे फौज ऊं मिली जाणकारी रे मुजब ईं साल 22 अप्रैल ने कश्मीर मांय पहलगाम री बैसरन घाटी मांय व्ह्या आतंकी हमला मांय शामिल तीन आतंकवादियां ने श्रीनगर रा हरवान कने लिडवास हलका मांय फौज कानी ऊं चलायी ज्या ऑपरेशन महादेव रा तैत मार दिया ज्या है। हलका मांय तलाशी अभियान चलायो जा रह्यो है।