ऑपरेशन सिंदूर रा तैत करी ज्यी कार्रवाई रे दौरान भारत री फौज री हिम्मत री सराहवणा करता थकां बुधवार ने ई प्रदेश मांय केई कार्यक्रम राख्यी ज्या। सवाईमाधोपुर मांय तिरंगा यात्रा निकाळी ज्यी, जिण रो न्यारा-न्यारा संगठनां री ओर ऊं फूलां री बरसात कर र स्वागत करी ज्यो। ईं दौरान देशभक्ति रा गीतां सागे भारत माता री जय रा नारा लगायी ज्या। यात्रा मांय मोटी तादाद मांय पैली वाळा फौजी, एनसीसी कैडेट्स, स्काउट गाइड अर सामाजिक संगठनां रा नुमाइन्दा शामिल व्ह्या। श्रीगंगानगर मांय तेज़ गर्मी बीचे जोश सागे तिरंगा यात्रा निकाळी ज्यी, जिण मांय बुजु़र्गां अर पैली वाळा फौज़ियां सागे मोटी तादाद मांय जनता ई सिरकत कीनी। झुंझुनूं मांय भारतीय जनता पार्टी री ओर ऊं न्यारा-न्यारा सामाजिक संगठनां सागे मिल र तिरंगा यात्रा निकाळी ज्यी। खास बाज़ारां ऊं व्हेती थकी शहीद स्मारक पूगी ईं यात्रा मांय पांच सौ फीट लम्बा तिरंगा झंण्ड़ा माथे सगळां रो खास ध्यान रह्यो। ऑपरेशन सिंदूर री कामयाबी पाछे आकाशवाणी जयपुर रा समाचार सुणबा वाळा ई वां री खुशी जता रह्या है। बाड़मेर रा हीरा राम सारण ऑपरेशन सिंदूर री सफलता अर भारत री फौज़ रा पराक्रम ने नमन कीनो है। देश ने मोकळा फौज़ी देवण वाळा झुंझुनूं ज़िला रा पैली वाळा फौजी कर्नल शौकत अली ऑपरेशन सिंदूर ने अभूतपूर्व बताता थकां बधाई दीनी।