उप-राष्ट्रीय पल्स पोलियो अभियान रे तैत दीतवार ने प्रदेशभर मांय 58 हजार ऊं बत्ती पोलियो बूथां माथे पांच साल तांई रा टाबरां ने पोलियो रोधी दवा पिलाई ज्यी। किंणी कारण बूथ माथे दवा पीवण ऊं बच्योड़ा टाबरां ने स्वास्थ्यकर्मी आवता दो दिन घर-घर जार पोलियो प्रतिरक्षक दवा देवेला। अभियान रे तैत प्रदेश रा कोई 1 करोड़ 8 लाख टाबरां ने पोलियो री खुराक देवण रो लगस राखी ज्यो है। मुख्यमंत्री भजनलाल शर्मा आपरा रेहवास माथे टाबरां ने पोलियो प्रतिरक्षक दवा पिलार ई अभियान री सरूआत करी। ईं मौके श्री शर्मा कयो के ओ फगत एक अभियान नी है, बल्कि आवण वाळी पीढ़ियां ने हिफाजती भविष्य देवण रो जरियो है। ईं दौरान मुख्यमंत्री ‘‘दो बूंद हर बार-पोलियो पर जीत रहे बरकरार’’ पोस्टर रो विमोचन ई करयो। प्रदेश रा सगळा जिलां मांय लोगां आपरा पांच साल तांई रा टाबरां ने बूथ माथे ले जार पोलियो रोधी दवा पिलाई। अस्पतालां अर स्वास्थ्य केन्द्रां रे अलावा, रेलवे ठेसनां अर बस स्टेण्ड समेत न्यारी-न्यारी सार्वजनिक ठोडां माथे लोगां री सुविधा सारू पोलियो बूथ बणायी ज्या।