उपराष्ट्रपति जगदीप धनखड कह्यो है के पर्यटन लोगां ने आपस में जोड़े है जो बगत री जरूरत है। वे शुक्रवार ने विश्व पर्यटन दिवस रे मौके नई दिल्ली मांय राख्यी ज्या जळसा मांय बोल रह्या हा। धनखड़ कह्यो के सैर-सपाटा रो शांति बणायी राखण मांय मोटा काम व्हे है। वे कह्यो के विश्व पर्यटन दिवस रो ईं साल रो मुद्दो – पर्यटन और शांति भारत रा लोकतंत्र सारू ई उपयुक्त है। इंर् मौके पर्यटन मंत्री गजेन्द्र सिंह शेखावत कह्यो के सैर-सपाटा रे मार्फत न्यारी-न्यारी संस्कृतियां अर देशां बीचे समझ बढ़ाई जा सके है। कार्यक्रम मांय उपराष्ट्रपति पर्यटन मंत्रालय री पर्यटन मित्र अर श्रेष्ठ पर्यटन गांव होड़ सरीखी न्यारी-न्यारी पहलां री सरूआत कीनी। विश्व पर्यटन दिवस रे मौके प्रदेश मांय ई शुक्रवार ने न्यारा-न्यारा कार्यक्रम राख्यी ज्या अर सैलाणियां ने सरकारी स्मारकां ने मुफ़्त निरखण रो मौको दियो ज्यो। झालावाड़ मांय ऑनलाईन तरीका ऊं राष्ट्रीय स्तर री प्रश्नोत्तरी होड़ राख्यी ज्यी। शुक्रवार ने संवारे सूर्य मंदिर झालरापाटन मांय लोक कलाकार बिन्दौरी लोक नृत्य पेश कीनो। ईं पाछे सेमिनार राख्यी ज्यी अर पौधा रोपी ज्या अर सांस्कृतिक कार्यक्रम पेश करी ज्यो। जैसलमेर मांय Tourism and peace मुद्दा माथे राख्यी ज्या कार्यक्रम मांय नामी कलाकार परम्परागत राजस्थानी लोकसंगीत गाया। वठे देशी-परदेशी सैलानियां रो माळा पहरा र स्वागत करी ज्यो। ईं मौके नगरपरिषद री ओर ऊं सैर सपाटा री खास ठौड़ां ने रंग- बिरंगी रोशनी सागे सजायी ज्यी। सरकारी संग्रहालय मांय पर्यटन विभाग री ओर ऊं स्वच्छता अभियान चलायी ज्यो। अजमेर मांय मोटी तादाद मांय लोग ऐतिहासिक धरोहरां ने देखी। वठे प्रशासन री ओर ऊं सांस्कृतिक कार्यक्रम अर कच्छी घोड़ी नाच रो कार्यक्रम राख्यी ज्यो। उदयपुर मांय ई न्यारी-न्यारी ठौड़ां सैलाणियां रो स्वागत करी ज्यो अर कार्यक्रम राख्यी ज्या।