उपमुख्यमंत्री दिया कुमारी सोमवार ने जयपुर रा सवाईमानसिंह अस्पताल रो दौरो कर र वठे ट्रोमा वॉर्ड मांय लाय लागण रे कारण व्ह्या हादसा पाछे चलाया जा रह्या राहत अर ईंलाज रा काम रो जायजो लीनो। वे वार्ड मांय जा र जख्मी़ लोगां ऊँ मुलाकात कीनी, वां रा हाल-चाल पूछ्या अर डॉक्टरां ऊँ जरूरी जाणकारी हासिल कीनी। दिया कुमारी हादसा ने घणी पीड़ा देवण वाळो बताता थकां कह्यो के सरकार पीड़ित पिरवारां सागे पूरी सहानुभूति राखे है। पुलिस महानिदेशक राजीव शर्मा ई दूजा आला अहलकारां सागे हादसा री ठौड़ो दौरो कीनो। वे कह्यो के पुलिस न्यारी-न्यारी एजेन्सियां री मदद ऊँ ईं वाकया री जांच कर रही है। उपराष्ट्रपति सी.पी. राधाकृष्णन ईं हादसा माथे दुःख जतायो है। वे सोशल मीडिया पोस्ट रे जरिये जख़्मी लोगां रे बेगा ई ठीक व्हेवण री कामना कीनी अर मरण वाळां रा पिरवार वाळां सारू संवेदना जतायी। ईं बीचे भारतीय जनता पार्टी रा प्रदेश अध्यक्ष मदन राठौड़ कह्यो के सरकार हर पीड़ित ने साता देवण सारू काम कर रही है। ध्यानजोग है के एस.एम.एस. अस्पताल मांय ट्रॉमा सेंटर रा आई.सी.यू. मांय काल लागी ज़बरदस्त लाय रे कारण वठे भर्ती छह मरीजां री मौत व्हे ग्यी ही। मरण वाळा सगळा लोगां री पिछाण व्हे ग्यी है। सरकार हादसा री जाँच सारू चिकित्सा शिक्षा आयुक्त री अगुवाई मांय छह सदस्यां री समिति बणायी है जो लाय लागण रा कारण अर हिफ़ाजती व्यवस्थावां री विगतवार रपट पेश करेला।