प्रदेश मांय राज्यसभा री एक सीट खातर होबा वाळा उपचुनाव बाबत नामांकन रो बुधवार ने आखिरी दिन है। ईं सीट खातर भारतीय जनता पार्टी हाल तांई आपरो उम्मीदवार तय नी कर्यो है। भाजपा रा प्रदेशाध्यक्ष मदन राठौड़ बताया के सिम्बल आ ग्यो है अर बेगी ही राज्यसभा उम्मीदवार रो नाम भी तय कर लियो जावेला। भाजपा प्रत्याशी काल नामांकन भरेला। ईं बीच, कांग्रेस इण राज्यसभा उप चुनाव खातर उम्मीदवार नी उतारबा रो ऐलान कर्यो है। पार्टी रा प्रदेशाध्यक्ष गोविन्द सिंह डोटासरा आज जयपुर मांय मीडिया ने बताया के राज्यसभा उपचुनाव मांय कांग्रेस आपरो उम्मीदवार नी उतारेला। भारतीय जनता पार्टी रे कने इण ने जीतबा खातर चावतो बहुमत है। कांग्रेस कानी ऊं उम्मीदवार नी उतारबा री हालत मांय भाजपा प्रत्याशी रो निर्विरोध निर्वाचित होणो करीब-करीब तय मान्यो जा रह्यो है।