उत्तराद हवा अर पहाड़ी हलका मांय व्ही बर्फबारी रे कारण प्रदेश मांय ठण्ड रो असर बध ग्यो है। दीतवार ने राज्य मांय सब ऊँ कम 2 दशमलव 1 डिग्री सेल्सियस कमती रो तापमान सीकर रा फतेहपुर मांय दर्ज व्ह्यो। करौली मांय 2 दशमलव 4, पाली मांय 3 दशमलव 6, दौसा मांय 3 दशमलव 9, बारां रा अंता मांय 5 दशमलव 1, चूरू मांय 5 दशमलव 4 डिग्री सेल्सियस कमती रो तापमान दर्ज व्ह्यो। वठे ई दीतवार ने भीलवाड़ा मांय संवारा बादळ छाया रहवण ऊँ दिन रा तापमान मांय थोड़ी बढवार व्ही। मौसम केन्द्र जयपुर मुजब काले मौसम साफ रहवेला। नुवा आथूणी विक्षोभ रे सक्रिय होवण ऊँ 31 दिसम्बर अर एक जनवरी ने राज्य रा बीकानेर संभाग अर शेखावाटी हलका रा कुछ भागां मांय हल्की मावट व्हेवण रा आसार है। वठे ई राज्य रो उत्तराद अर आथूणी भागां मांय जनवरी रा पहला हफ्ता मांय घणो कोहरो छायो रह सके है। कोहरा रे कारण केई रेलगाडियां री आवाजाही माथे असर व्हे रह्यो है। रेलवे जातरियां ने सलाह दी है के वे टेशन माथे जावण ऊँ पैला रेल री मौजूदा स्थिति जाण लेवे।