आतंकवाद रे खिलाफ चलायी ज्या ऑपरेशन सिंदूर री कामयाबी परां भारतीय जनता पार्टी री ओर ऊं पूरा देश मांय राष्ट्र गौरव तिरंगा यात्रा निकाळी जा रही है। 23 मई तांई चालण वाळी ईं यात्रा रे जरिये भारत री फौज री हिम्मत अर वीरता ने नमन कर्यो जा रह्यो है। ईं सिलसिला मांय जोधपुर समेत केई रेलवे टेसनां ने तिरंगी रोशनी ऊं सजायी ज्या है अर देशभक्ति रा गीत बजाया जा रह्या है। यात्रा रे जरिये जनता रा दिल-दिमाग मांय देशभक्ति अर राष्ट्रीयता रो जज़्बो जगायो जावेला। ईं बीचे उपमुख्यमंत्री डॉ. प्रेमचंद बैरवा कह्यो है के पहलगाम आतंकी हमला पाछे चलायी ज्या ऑपरेशन सिंदूर रा इतिहास ने आवता बगत मांय बच्चां ने पढ़ायो जावेला। वे आज कोटा मांय खबरनवीसां सागे बातचीत कर रह्या हा। वे कह्यो के पहलगाम आतंकी हमला री जवाबी कार्यवाही रा तौर ऊं चलायी ज्या ऑपरेशन सिंदूर रा तैत भारत, पाकिस्तान मांय केई आतंकी ठिकाणा नेस्तनाबूद कर दीना। वे कह्यो के फौज री निष्ठा, देशभक्ति अर रण कौशल माथे देश रा हर रेहवासी ने नाज़ है। दूजी कानी भाजपा रा प्रदेश अध्यक्ष मदन राठौड़ आज जैसलमेर रा उगरास गांव रो दौरो कर र भारत-पाक तनाव रे दौरान पटकी ज्यी मिसाइल री ठोड ई देखी। श्री राठौड़ मुश्किल हालात मांय बीएसएफ रा काम री सराहवणा कीनी। कैबिनेट मंत्री हीरालाल नागर ई आज कोटा ज़िला रा सांगोद मांय निकाळी ज्यी राष्ट्र गौरव तिरंगा यात्रा मांय शिरकत कीनी। देश री हिफाज़त मांय लाग्योड़ा फौजियां रा मान मांय काल जयपुर मांय तिरंगा यात्रा निकाळी जावेला। प्रधानमंत्री नरेन्द्र मोदी ई लारला दिनां देश रा नाम दिया ज्या संबोधन मांय आतंकवाद ने बिल्कुल बर्दाश्त नी करण री नीति माथे ज़ोर दीनो हो।