आखा देश रे साथै ई उत्तर-पश्चिम रेलवे मांय नुवी साल री सरूआत र साथै ई रेलगाड़ियां री नुवी समय सारिणी लागू व्हे ग्यी है। उत्तर-पश्चिम रेलवे रा मुख्य जनसंपर्क अहलकार कैप्टेन शशि किरण बतायो के नुवी समय सारणी मांय नुवी रेलां रा संचालन, रेलां रा फैलाव, फेरा मांय बढ़वार, रेल रा नम्बर मांय बदलाव, नुवा ठहराव अर न्यारा-न्यारा टेशणा माथे रेल रे आवण-जावण रा बगत मांय बदलाव व्ह्यो है। वणा बतायो के 66 रेलगाड़ियां रा न्यारा-न्यारा टेशनां माथे आवण जावण रा बगत मांय 30 मिनट अर बत्ती रो बदलाव व्ह्यो है। इण रे साथै ई गुरूवार ऊँ रेलवे रा न्यारा-न्यारा दर्जा रा किराया मांय मामूली बढ़वार व्ही है।