प्रधानमंत्री नरेन्द्र मोदी कह्यो है कि भारत कृषि खेतर मांय बड़ी उपलब्धि हासिल करता व्ह्या 357 मिलियन टन खाद्यान उत्पादन रो ऐतिहासिक रिकॉर्ड बणायो है। श्री मोदी दीतवार ने आकाशवाणी सूं प्रसारित होवण वाळी मन की बात कार्यक्रम री 128वीं कड़ी मांय देशवासियां सूं बोल रह्या हा। वणा कह्यो के आपणे सब रो फर्ज है की धरती माता री रक्षा खातिर प्राकृतिक खेती ने लगातार बधावो देवा। इण मौके माथे श्री मोदी खेलां मांय भारत री उपलब्धियों अर अंतरिक्ष खेतर री ऊंची उड़ान री बात करी है। श्री मोदी देशवासियां सूं वोकल फॉर लोकल रे मंत्र ने साथै लेर चालणे री अरज करी है। वणा आवता क्रिसमस अर नुवा साल री खरीदारी मांय वोकल फॉर लोकल री भावना ने ध्यान मांय राखणे रो हेलो कर्यो है।प्रधानमंत्री नरेन्द्र मोदी ने कह्यो की जी-20 शिखर सम्मेलन मांय कनाडा रा प्रधानमंत्री ने उदयपुर रा कारीगरां कानी सूं बणायोड़ो चांदी रो अश्व भेंट कर्यो, जको कि राजस्थान री शिल्पकला अर सांस्कृतिक विरासत रो गौरवशाली प्रतीक है। श्री मोदी रिकॉर्ड शहद उत्पादन, स्पेस स्काई रूट मांय इनफिनिटी कैम्पस तथा संविधान दिवस अर अयोध्या मांय धर्म ध्वजा रे फहराणे री भी बात करी। वणा भारतीय संस्कृति मांय शांति अर करूणा रे भाव ने सब सूं ऊंचो बताता थकां कह्यो की दुनिया भर मांय लोग गीता सूं प्रेरित हो रह्या है। श्री मोदी 4 दिसम्बर ने मनायो जावण वाले नौ सेना दिवस रो जिक्र करता व्ह्या कह्यो की लगातार मजबूत होता भारत रे सुरक्षा तंत्र माथे हर भारतीय ने गर्व है। वणा कह्यो की आईएनएस माहे ने भारतीय नौसेना मांय भेळो कर्यो जाणो रक्षा खेतर मांय देश री बधती ताकत ने दिखावे है। प्रदेशभर मांय मन की बात कार्यक्रम ने सुण्यो गयो। शहरी अर ग्रामीण खेतरां मांय घणी तादाद मांय मण्डल कार्यालयां अर सार्वजनिक जागावां माथे पार्टी पदाधिकारियां, कार्यकर्तावां अर आम जन ने मन की बात कार्यक्रम ने सुण्यो। मुख्यमंत्री भजनलाल शर्मा ने सांगानेर कैम्प ऑफिस मांय कार्यकर्तावां साथे मन की बात कार्यक्रम सुण्यो।