प्रधानमंत्री नरेन्द्र मोदी कह्यो है के स्वास्थ्य ऊं ले र सामाजिक हिफ़ाज़त तांई हर हलका मांय देश तेज़ी ऊं आगे बध रह्यो है। दीतवार ने आकाशवाणी ऊं प्रसारित करी ज्या खास कार्यक्रम मन की बात मांय श्री मोदी कह्यो के दीतवार ने  देश की जनता ने सामाजिक हिफ़ाजत ऊं जुड़ी भांत-भांत री योजनावां रो फायदो मिल रह्यो है। वे अंतर्राष्ट्रीय श्रम संगठन री एक रपट रो जिक्र ई कीनो, जिण रे मुजब देश री 64 फीसदी ऊं बत्ती आबादी ने सामाजिक हिफ़ाजत री किण ई न किण ई योजना रो फायदो मिल रह्यो है। श्री मोदी विश्व स्वास्थ्य संगठन री वां रपट रो ई जिक्र कीनो जिण मांय भारत मांय आंख्यां री बीमारी ट्रेकोमा रे जड़ ऊं खत्म व्हे जावण रो ऐलाण करी ज्यो है। प्रधानमंत्री साल 1975 मांय लगायी ज्या आपातकाल रो जिक्र करता थकां कह्यो के देश माथे इमरजेंसी थोपी जावण रा 50 साल कुछ दिन पैली ही पूरा व्ह्या है अर देशवासी ष्संविधान हत्या दिवसष् मनायो है। श्री मोदी कह्यो इमरजेंसी रो डट र मुकाबलो करण वाळा सगळा लोगां ने याद करणा चाहिजे। वे कह्यो के इण ऊं संविधान ने मजबूत बणायो राखण सारू लगातार सावचेत रेहवण री सीख मिले है। मन की बात मांय प्रधानमंत्री कह्यो के 21 जून ने मनायी ज्या अंतर्राष्ट्रीय योग दिवस रे मौके राख्यी ज्या कार्यक्रमां मांय दुनियाभर मांय करोड़ां लोग सिरकत कीनी। श्री मोदी कैलाश मानसरोवर यात्राए अमरनाथ यात्रा अर जगन्नाथ रथ यात्रा री ई चर्चा कीनी। वे कह्यो के अ यात्रावां पूरा देष मांय एक भारत श्रेष्ठ भारत रा भाव रो दरसाव करे है। श्री मोदी कह्यो के धार्मिक यात्रावां सेवा रा मौकां रो महाअनुष्ठान ई व्हे है। श्री मोदी हाल ही अंतर्राष्ट्रीय अंतरिक्ष केंद्र ऊं जुड़्या भारत रा ग्रुप कैप्टन शुभांशु शुक्ला रो ई जिक्र कीनो। प्रदेश मांय ई प्रधानमंत्री रा मन की बात कार्यक्रम ऊं जुड़्यो उमाव निजर आयो। मुख्यमंत्री भजन लाल शर्मा वां रा रहवास माथे ओ कार्यक्रम सुण्यो। वे कह्यो के प्रधानमंत्री री अगुवाई मांय देश तेज़ी ऊं आगे बध रह्यो है। पाली मांय भारतीय जनता पार्टी रा ज़िला मुख्यालय मांय ई मन की बात कार्यक्रम सुणी ज्यो।