प्रधानमंत्री नरेंद्र मोदी कह्यो है के भारत ईं साल राष्ट्रीय सुरक्षा, खेल अर विज्ञान ऊँ ले र दुनिया रा सब ऊँ मोटा मंचा तांई हर ठौड़ आप री मजबूत छाप छोड़ी है। आकाशवाणी ऊँ मन की बात कार्यक्रम मांय प्रधानमंत्री कह्यो के साल 2025 हर भारतीय ने मान दिरावण वाळा केई क्षण दिया है। श्री मोदी कह्यो के ‘ऑपरेशन सिंदूर’ ईं साल हर भारतीय सारू गर्व रो प्रतीक बण ग्यो। श्री मोदी राष्ट्रीय गीत वंदे मातरम री 150 वीं सालगिरह माथे लोगां रा उमाव अर जज्बा री सराहवना करी। वणा कह्यो के हैशटैग वंदेमातरम एक सौ पचास रे साथै लोगां आप रा संदेश अर सुझाव साझा कर्या, जो सरावण जोग है। प्रधानमंत्री कह्यो के खेल सारू ई साल 2025 याद राखण जोग रियो। श्री मोदी विश्व चैंपियनशिप मांय केई तमगा जीतण वाळा पैरा-एथलीटा री ई सराहवना करी। प्रधानमंत्री कह्यो के ई साल विज्ञान समेत केई हलकां मांय भारत अनेको कामयाबी हासिल करी। श्री मोदी कह्यो के प्रयागराज महाकुंभ पूरी दुनिया ने चौका दिया। देश री युवा शक्ति रो जिक्रो करता प्रधानमंत्री ‘विकसित भारत युवा नेता संवाद’ रा दूजा संस्करण रे बेगा ई करण ने ई कह्यो। प्रधानमंत्री कह्यो के देश नुवी आशावां अर नुवां संकल्पां रे साथै 2026 मांय जावण सारू तैयार है। श्री मोदी आशा जतायी के साल 2026 विकसित भारत रा लगस ने हासिल करण कानी एक महाताऊ कामयाबी साबित व्हेला। वणा सगळां ने साल 2026 री शुभकामनावां दी। प्रदेश मांय ई मन की बात कार्यक्रम ने ले र घणों उमाव निजर आयो। जयपुर मांय आप रा रहवास माथे मुख्यमंत्री भजन लाल शर्मा रा विचार सुण्या। श्री शर्मा कह्यो के प्रधानमंत्री मन की बात कार्यक्रम री मार्फत देश री प्रगति रो सफर आपा रे साथे साझा करे है। ओ कार्यक्रम देश री कामयाबी माथे मान करण रो मौको है, जो आपा ने बरोबर आगे बधण री सीख देवे है। ईं दौरान विधायक डॉ. गोपाल शर्मा, पैली रा विधायक रामलाल शर्मा समेत केई जननुमाइन्दा अर लोग ई मौजूद रिया। पाली, भीलवाड़ा समेत दूजा ज़िला मांय ई मन की बात कार्यक्रम ने भाजपा कार्यकर्तावां अर लोगां उमाव रे साथै सुण्या।