गैर-सरकारी विमान कंपनी एयर इंडिया री अहमदाबाद ऊं लंदन जा रही यात्री उड़ान संख्या ए.आई-171 गुरूवार ने अहमदाबाद हवाईअड्डा कने हादसा री शिकार व्हे ग्यी। नागरिक उड्डयन महानिदेशालय रे मुजब हवाई जहाज़ मांय 242 मुसाफिर सवार हा अर विमान उड़ान भरण पाछे कुछ मिनटां मांय रिहायशी हलका माथे पड़ ग्यो। गिर गया। आं मांय 2 पायलट अर 10 केबिन क्रू ई शामिल है। एयर इंडिया कानी ऊं जारी पानड़ी रे मुजब विमान मांय 53 ब्रिटिश, 7 पुर्तगाली अर 1 कनाडाई नागरिक समेत 61 परदेसी मुसाफ़िर ई सवार हा। हादसा रा शिकार लोगां ऊं जुड़ी जाणकारी मुहैया करावण सारु विमान कम्पनी एयर इंडिया हॉट लाइन नम्बर 1800 5691 444 जारी कीना है। नागरिक उड्डयन मंत्रालय ई परिचालन नियंत्रण कक्ष खोल्यो है, जिण रा नम्बर 011-24610843 अर 96503-91859 है। मुसाफिरां री मदद अर पूछताछ सारू अहमदाबाद हवाई अड्डा माथे हेल्पलाइन नंबर 99741-11327 मुहैया करायी ज्यो है। ईं बीचे एनडीआरएफ अर फायर ब्रिगेड री टीमां लगातार बचाव अर राहत रा काम कर रही है। हादसा मांय जख्मी लोगां ने अहमदाबाद रा सिविल अस्पताल मांय भर्ती करायी ज्या है। प्रधानमंत्री नरेन्द्र मोदी हादसा माथे गहरो दुःख जताता थकां गृहमंत्री अमित शाह अर नागरिक उड्डयन मंत्री राम मोहन नायडू ने फोन कर र जाणकारी लीनी। प्रधानमंत्री हालात रो जायज़ो ले र वां ने अहमदाबाद जावण सारु कह्यो। श्री मोदी गृहमंत्री अर नागरिक उड्डयन मंत्री ने हादसा री जद मांय आवण वाळां री तुरत हर-संभव मदद करण सारु कह्यो। श्री नायडू प्रधानमंत्री ने बतायो के वे बचाव अर राहत रा कामां री निगराणी सारु अहमदाबाद जा रह्या है। नागरिक उड्डयन मंत्री कह्यो के संबंधित एजेंसियां हाई अलर्ट माथे है।
राष्ट्रपति द्रौपदी मुर्मू, उपराष्ट्रपति जगदीप धनखड़, लोकसभा अध्यक्ष ओम बिरला अर प्रधानमंत्री नरेन्द्र मोदी हादसा माथे गहरो दुःख जतायो है। प्रधानमंत्री नरेन्द्र मोदी एयर इंडिया विमान हादसा ने दिल तोड़बा वाळो बतायो है। श्री मोदी कह्यो के वे हादसा री जद मांय आया लोगां री मदद सारू काम कर रह्या मंत्रियां अर अहलकारां रा सम्पर्क मांय है। प्रधानमंत्री कह्यो के दःुख री ईं घड़ी मांय वां री संवेदना सगळा प्रभावित लोगां सागे है।
राज्यपाल हरिभाऊ बागडे़ हादसा माथे गहरो शोक जताता थकां मरण वाळां री आत्मा री शांति री प्रार्थना कीनी अर ज़ख्मी लोगां रे बेगा ई ठीक व्हेवण री कामना कीनी। मुख्यमंत्री भजनलाल शर्मा ई हादसा रा शिकार व्ह्या लोगां रा प्रति संवेदना जताई है। दुनिया रा दूजा हलकां ऊं ई एयर इंडिया विमान हादसा पाछे प्रतिक्रियावां मिल रही है। ब्रिटेन रा प्रधानमंत्री कीर स्टार्मर सोशल मीडिया पोस्ट रे जरिये हादसा माथे दुःख जताता थकां कह्यो के दःुख री घड़ी मांय वां री संवेदना मुसाफिरां अर वां रा पिरवार वाळां सागे है। रूस रा राष्ट्रपति ब्लादिमिर पुतिन, ऑस्ट्रेलिया रा प्रधानमंत्री एल्बेनीज़ अर फ्रांस रा राष्ट्रपति मेक्रों ई हादसा माथे दुःख जतायो है।
एयर इंडिया रा चेयरमैन एन. चंद्रशेखरन ई हवाई जहाज़ हादसा माथे दुःख जताता थकां कह्यो के वां रो खास ध्यान प्रभावित लोगां अर वां रा पिरवार वाळां री मदद करण माथे है। चेयरमैन कह्यो के एक आपातकालीन केंद्र काम करण लाग्यो है। वे कह्यो के एयर इंडिया हादसा री ठोड माथे प्रभावित लोगां ने हर भांत री मदद अर देखभाल सारू पूरी ताकत ऊं काम कर रह्यो है। अहमदाबाद विमान हादसा पाछे देश मांय शोक रो माहौल है। भारतीय जनता पार्टी गुरूवार ने प्रदेश मांय व्हेवण वाळा केई कार्यक्रम रद्द कर दीना है।