अन्तर्राष्ट्रीय योग दिवस काल मनायो जावेला। 11वां अन्तर्राष्ट्रीय योग दिवस रो ईं साल रो मुद्दो एक पृथ्वी-एक स्वास्थ्य के लिए योग राख्यी ज्यो है। ईं सिलसिला मांय देशभर मांय जोर-शोर ऊं तैयारियां करी जा रही है। योग दिवस रे मौके आयुष मंत्रालय री ओर ऊं आंध्र प्रदेश रा विशाखापट्टनम मांय राख्या जावण वाळा राष्ट्रीय कार्यक्रम मांय प्रधानमंत्री नरेन्द्र मोदी ई सिरकत करेला। ईं मौके संस्कृति मंत्रालय री ओर ऊं देश री एक सौ नामी ठौड़ां अर विरासत वाळी 50 ठौड़ां योग सत्र राख्या जावेला। प्रदेश मांय ई योग दिवस ऊं जुड़्यो उमाव निजर आ रह्यो है। राज्य स्तर रो जळसो जैसलमेर मांय खुहड़ी रा रेतीला धोरा मांय राख्यो जावेला, जिण मांय मुख्यमंत्री भजन लाल शर्मा ई सिरकत कर र योग रे मार्फत निरोगा रहवण री अलख जगावेला। ईं सागे ई सगळा ज़िलां, उपखण्डां अर ग्राम पंचायत मुख्यालयां माथे ई सामूहिक योगाभ्यास रा कार्यक्रम राख्या जावेला। न्यारा-न्यारा शैक्षणिक संस्थानां अर सामाजिक संगठनां री ओर ऊं ई योग सत्र राख्या जा रह्या है। योग दिवस री पैली वाळी सिंज्यां आज बांसवाड़ा, अजमेर, बाड़मेर, पाली, झुन्झुनू, बालोतरा, जैसलमेर अर डीग समेत केई ठौड़ां जागरूकता रैली निकाळी ज्यी। इण रे मार्फत योग रा फायदां री जाणकारी देता थकां इण ने रोजमर्रा री जिन्दगी मांय शामिल करण री अपील करी ज्यी। क्षेत्रीय समाचार एकांश री ओर ऊं ई योग ऊं जुड़बा सारू जाग जगावण बाबत् विशेष संदेश श्रृंखला चलायी जा रही है।