अजमेर रा महर्षि दयानंद सरस्वती विश्वविद्यालय मांय दीतवार ने अखिल भारतीय राष्ट्रीय शैक्षिक महासंघ कानी ऊं शिक्षक सम्मेलन राख्यो गयो। सम्मेलन ने संबोधित करता थकां राज्यपाल हरिभाऊ बागड़े कया के शिक्षा राष्ट्र निर्माण मांय महताऊ भूमिका निभावे है। आपरी मां अर परिवार सूं मिली शिक्षा सूं टाबर छोटी उमर मांय ही केई खास बातां सीख लेवे है। शिक्षक ने विद्यार्थियां रा समूचा विकास ने ध्यान मांय राख र पढ़ाणो चाहिजे। इण सूं विद्यार्थी अपरा जीवन मांय तरक्की करेला। राज्यपाल कया के श्री माधव सदाशिव गोलवकर ‘गुरूजी’ रा विचारां माथे नुवी शिक्षा नीति माथे जोर देवणो चाहिजै। शिक्षा मांय सुधार खातर बणी नीतियां, शिक्षा आयोग अर कमेटियां रा सुझाव रो असर प्राथमिक शिक्षा माथे होबा सूं पढणियां मांय राष्ट्र प्रथम रो भाव जागेला। भारतीय शिक्षा पद्धति मांय म्हाकी संस्कृति, देवधर्म अर आदर्शां रा आचरण ने ठोर देणी चाहिजे।