अंता विधानसभा सीट माथे उपचुनाव सारु मंगलवार ने वोट पड़ेला। ईं सारु मतदान री सगळी तैयारियां पूरी व्हे ग्यी है। ईं विधानसभा हलका मांय संवेदनशील मतदान केन्द्रां माथे केंद्रीय सशस्त्र पुलिस बल रा जवान तैनात कर्या जा रह्या है। म्हाणा खबरनवीस बतायो के सामान्य मतदान केन्द्रां माथे हिफ़ाज़त रा पुख्ता बन्दोबस्त करी ज्या है। राज्य रा मुख्य निर्वाचन अधिकारी नवीन महाजन अर बारां रा ज़िला निर्वाचन अधिकारी हलका रा सगळा मतदातावां ऊं वोट ज़रुर देवण री अपील कीनी है। मतदाता पहचान पत्र-ईपिक रे अलावा फोटो लाग्योड़ा 12 दूजा कागज़ात बता र ई वोट दियो जा सकेला। वोट पड़बा रो काम पूरो व्हेवण पाछे इलेक्ट्रिॉनिक वोटिंग मशीनां ने हिफ़ाज़त रा करड़ा इंतज़ाम बीचे बारां रा राजकीय स्नातकोत्तर महाविद्यालय मांय पूगायी जावेला। वोटां री गिणती 14 नवम्बर ने करी जावेला। अंता सीट माथे 2 लाख 27 हजार 563 मतदाता वोट देवण री काबिलियत राखे है। ज़िला निर्वाचन अधिकारी रोहिताश्व सिंह तोमर बतायो के सगळा पोलिंग बूथ माथे पोलिंग पार्टियां पूग ग्यी है। ईं उपचुनाव मांय भाजपा रा मोरपाल सुमन, कांग्रेस रा प्रमोद जैन अर निर्दलीय उम्मीदवार नरेश मीणा बीचे करड़ो मुकाबलो व्हेवण रा आसार है। साल 2023 मांय व्ह्या विधानसभा चुनाव मांय अंता सीट ऊं भारतीय जनता पार्टी रा कंवरलाल मीणा जीत्या हा, पण एक जूना आपराधिक मामला मांय वां ने अदालत कानी ऊं दोषी करार दिया जावण पाछे ईं साल मई महीना ऊं वां री विधानसभा सदस्यता रद्द कर दीरीजी ही। ईं कारण अंता मांय उपचुनाव व्हे रह्या है।