विश्व दिव्यांग दिवस रे मौके राज्यपाल हरिभाऊ बागडे़ सगळा ऊँ दिव्यांगजन रा भला सारू समर्पित व्हे र काम करण बाबत् कह्यो। श्री बागडे़ बुधवार ने न्यारा-न्यारा संगठनां री ओर ऊँ राख्यी ज्या कार्यक्रमां मांय शामिल व्ह्या। वे कह्यो के दिव्यांगजन दिव्य अर जीवन शक्ति ऊँ भरपूर व्हे है। राज्यपाल दिव्यांगजन ऊँ मन अर दिमाग ने तंदुरुस्त राखता थकां आगे बधबा सारू कह्यो। इण ऊँ पैली श्री बागडे़ ’विश्व दिव्यांग सम्मान’ रा तैत चुणी ज्या बच्चां समेत केई दिव्यांग जन रो मान कीनो। वे बच्चां री प्रतिभा ने आगे लावण अर ’दिव्यांगजन अधिकार विधेयक -2016’ रा प्रावधानां ने लागू करण माथे जोर दीनो। अंतर्राष्ट्रीय दिव्यांगजन दिवस रे मौके राज्य स्तर रो जळसो बुधवार ने  जयपुर मांय राख्यी ज्यो। जळसा मांय मुख्यमंत्री भजनलाल शर्मा ई शामिल व्ह्या। वे कह्यो के दिव्यांगजन समाज री अनमोल निधि है अर दिव्यांगजन मांय ज़बरदस्त इच्छा शक्ति अर विशेष योग्यता व्हे है, जिण रो फायदो सरकार ने मिलणो चाहिजे। मुख्यमंत्री जनता ऊँ दिव्यांगजन री प्रतिभा ने पिछाण र वां ने बधावो देवण बाबत् कह्यो। श्री शर्मा कह्यो के सरकार दिव्यांगजन  सारू क्लस्टर बणाया है, ज्यां रे मार्फत अहलकार हर तीन महीना मांय वां सागे मुलाकात कर र वां री परेशानियां री जाणकारी लेवेला।