21 जून ने मनाया जावण वाळा अंतर्राष्ट्रीय योग दिवस रे मौके देशभर मांय एके सागे, योग ऊं जुड़््या एक लाख ऊं बत्ता कार्यक्रम राख्या जावेला। अ कार्यक्रम संवारे साढे छह ऊं सात बज र चालीस मिनट तांई यानि 1 घंटा 10 मिनट तांई सामान्य योग प्रोटोकॉल माथे आधारित व्हेला। योग दिवस रो ईं साल रो मुद्दो ‘‘एक पृथ्वी, एक स्वास्थ्य’’ राख्यी ज्यो है। गुरूवार ने आयुष मंत्री प्रतापराव जाधव कह्यो के योग दिवस रो खास कार्यक्रम आंध्रप्रदेश रा विशाखापत्तनम मांय राख्यो जावेला। वे कह्यो के योग संगम री मेजबानी सारू देशभर ऊं 65 हजार ऊं बत्ता संगठन नाम मंडाया है।
11वां अंतरराष्ट्रीय योग दिवस रे मौके राज्य स्तर रो कार्यक्रम जयपुर रा सवाईमानसिंह स्टेडियम मांय राख्यो जावेला। राज्य मांय करीब 400 खास धार्मिक ठोडां, ऐतिहासिक महत्त्व री इमारतां अर सैर-सपाटा री ठोडां ई योगाभ्यास रा कार्यक्रम राख्या जावेला।
जिला, ब्लॉक अर पंचायत लेवल माथे ई योगाभ्यास रा कार्यक्रम राख्या जावेला। इण रे अलावा आयुष्मान आरोग्य मंदिरां, स्कूलां, सार्वजनिक बाग-बगीचां अर गैर-सरकारी संस्थावां समेत करीब 65 हजार ठोडां एक करोड़ जणां री भागीदारी रो लक्ष्य राख्यी ज्यो है। योग दिवस रे मौके व्हेवण वाळा कार्यक्रमां रो केंद्र सरकार रा योग संगम पोर्टल अर राज्य सरकार रा पोर्टल माथे पंजीयन कर्यो जावेला। मुख्यमंत्री भजनलाल शर्मा जनता ऊं बत्ती ऊं बत्ती तादाद मांय योग दिवस रा कार्यक्रमां मांय भागीदारी करण री अपील कीनी है। मुख्यमंत्री ईं बारा मांय जिला कलेक्टरां ने हुकम दीना है। उपमुख्यमंत्री अर आयुष मंत्री डॉ. प्रेमचंद बैरवा ई महकमा रा अहलकारां ने ज़रूरी तैयारियां करण बाबत् कह्यो है। सरकार जयपुर ग्रेटर नगर निगम री महापौर डॉ. सौम्या गुर्जर ने ईं साल रा योग दिवस री ब्रांड एम्बेसडर बणायी है। अंतर्राष्ट्रीय योग दिवस रा सिलसिला मांय आकाशवाणी जयपुर रा क्षेत्रीय समाचार एकांश री ओर ऊं संदेश श्रृंखला चलाई जा रही है। इण मांय आज पेश है जोधपुर रा डॉ. सर्वपल्ली राधाकृष्णन राजस्थान आयुर्वेद विश्वविद्यालय रा सह-आचार्य डॉ. चंद्रभान शर्मा रा विचार।