वीर शिरोमणि महाराणा प्रताप री जयंती रे मौके गुरूवार ने पूरा राज्य मांय वां ने सिरधाभाव सागे याद करी ज्या। ईं मौके राज्यपाल हरिभाऊ बागडे़ जयपुर रा राजभवन मांय महाराणा प्रताप री मूरत ने माळा पहरा र वां ने सिरधाभाव सागे याद कीना। श्री बागडे़ कह्यो के महाराणा प्रताप देश रा प्रति संकल्पबद्ध व्हे र लड़ता थकां सब कुछ निछावर करण री सीख देवण वाळा पहला राष्ट्र नायक हा। राज्यपाल नुवी पीढ़ी ने महाराणा प्रताप री गौरवगाथा ऊं जोड़बा बाबत् ई कह्यो। मुख्यमंत्री भजनलाल शर्मा चित्तौड़गढ़ रा भूपालसागर मांय राख्यी ज्या कार्यक्रम मांय महाराणा प्रताप, पन्नाधाय अर राणा पूंजा री मूरत रो अनावरण कीनो। ईं मौके श्री शर्मा विकास रा 517 करोड़ रूप्या रा कामां री नींव रखी अर पूरा व्ह्या काम जनता ने सूंप्या। वे कह्यो के जिण भांत मुश्किल हालात मांय महाराणा प्रताप वां रा सिद्धान्तां अर खुद रा मान सागे कोई समझौतो नी कीनो, वां ई भांत नुवी पीढ़ी ने ई सिद्धान्तां रे मुजब चालणो चाहिजे। मुख्यमंत्री कह्यो के महाराणा प्रताप रा नाम ऊं वां रे काम करण री न्यारी-न्यारी ठौड़ां चावंड, गोगुंदा, दिवेर अर हल्दीघाटी समेत केई ठौड़ां ने जोड़ र प्रताप पर्यटन सर्किट बणायो जा रह्यो है। मुख्यमंत्री प्रताप खेल विश्वविद्यालय खोलण री जाणकारी ई दीनी। श्री शर्मा कह्यो के 5 जून ने विश्व पर्यावरण दिवस अर गंगा दशहरा रा अनोखा संयोग रे दिन प्रदेश भर मांय पखवाड़ो चलायो जावेला। मुख्यमंत्री जनता ऊं गंगा दशहरा रे मौके कूड़ा-बावड़ियां अर तळावां री साफ़-सफ़ाई अर पूजन करण री अरज कीनी। श्री शर्मा कह्यो के प्रदेश मांय एक पेड़ मां के नाम अभियान रा तैत ईं साल 11 करोड़ पौधा रोप्या जावेला। कार्यक्रम मांय गृह राज्यमंत्री जवाहर सिंह बेढ़म, सहकारिता मंत्री गौतम दक अर सांसद सी.पी. जोशी समेत केई विधायक ई मौजूद रह्या। डूंगरपुर मांय न्यारा-न्यारा संगठनां री ओर ऊं महाराणा प्रताप री मूरत माथे फूल माळा चढाई ज्यी अर महाराणा प्रताप रा त्याग, तपस्या अर बलिदान ने याद करता थकां वां ऊं सीख लेवण रो संकल्प करी ज्यो। पाली मांय सूरजपोल ऊं महाराणा प्रताप स्मारक तांई शोभायात्रा निकाळी ज्यी। सामाजिक न्याय अर अधिकारिता मंत्री अविनाश गहलोत दूजा सागे महाराणा प्रताप री मूरत माथे सिरधा रा फूल चढ़ाया। ईं मौके राख्यी ज्यी संगोष्ठी मांय श्री गहलोत ऑपरेशन सिंदूर री कामयाबी रा बारा मांय कविता बांची। वे कह्यो के पाली मांय बेगो ई महाराणा प्रताप ऑडिटोरियम बणायो जावेला। सवाईमाधोपुर मांय ई न्यारा-न्यारा सगठनां री ओर ऊं महाराणा प्रताप री मूरत माथे फूल माळा चढ़ा र वां रा समर्पण अर बलिदान ने याद करी ज्यो। कोटपुतली-बहरोड़ अर झालावाड़ मांय महाराणा प्रताप रा फोटो माथे फूल चढ़ायी ज्या अर संगोष्ठी समेत न्यारा-न्यारा कार्यक्रम राख्यी ज्या। भरतपुर मांय गुरूवार रो दिन पराक्रम दिवस रा तौर ऊं मनायी ज्यो अर महाराणा प्रताप री मूरत ने गंगाजल ऊं नहलाई ज्यी। बारां मांय सिंज्यां री पोर मोटरसाइकिल रैली निकाळी जावेला अर कवि सम्मेलन व्हेला। राजसमंद मांय खमनोर रा अरण्य बाग मांय महाराणा प्रताप जयंती समारोह रख र तीन दिन रो कार्यक्रम सरू करी ज्यो। ईं मौके खमनोर ऊं शोभायात्रा निकाळी ज्यी। उदयपुर मांय ई चेतक सर्किल ऊं टाउन हॉल तांई शोभा यात्रा निकाळी ज्यी। ईं मौके राख्यी ज्या कार्यक्रम मांय केन्द्रीय मंत्री गजेन्द्र सिंह शेखावत अर विधानसभा अध्यक्ष वासुदेव देवनानी ई सिरकत कीनी। श्री शेखावत इतिहास ने सही संदर्भ मांय लिखण री ज़रूरत बतायी।