विश्व पर्यावरण दिवस 05 जून ने मनायो जायेला। आखी दुनिया मांय पर्यावरण संरक्षण सारू जाग जगावण सारू ओ दिन मनायो जावे। ई साल रो मुद्दो ‘‘प्लास्टिक प्रदूषण को समाप्त करना’’ राख्यी ज्यो है। ई मौके प्रधानमंत्री नरेन्द्र मोदी नुवी दिल्ली मांय खास वृक्षारोपण अभियान री सरुआत करेला। श्री मोदी एक पेड़ मां के नाम पहल रे तैत बरगद रो पौधो लगावेला। ओ सात सौ किलोमीटर री अरावली पर्वत श्रृंखला ने फेरू वनीकरण करण री पहल व्हेला। इण ने अरावली ग्रीन वॉल परियोजना नाम दीरीज्यो है। इण रो मकसद राजस्थान, दिल्ली, हरियाणा अर गुजरात रा 29 ज़िलां मांय अरावली पर्वत श्रृंखला रे आरे-सारे पांच किलोमीटर हलका ने हर्यो-भर्यो बणावणो अर अरावली री जैव विविधता ने बधावो देवणो है। विश्व पर्यावरण दिवस रे मौके प्रदेश मांय ई केई आयोजव व्हेला। राज्य थर रो जळसो जयपुर रा राजस्थान इंटरनेशनल सेंटर मांय व्हेला। कार्यक्रम मांय मुख्यमंत्री भजनलाल शर्मा सिरकत करेला। श्री शर्मा ई-वेस्ट कलेक्शन ड्राइव अर वर्चुअल पांच लवकुश वाटिकावां री सरूआत करेला। इण रे साथै ई सांगानेर रा सामान्य अपशिष्ट उपचार संयंत्र रो लोकार्पण करेला।इण रे पछे मुख्यमंत्री रो बूंदी रा केशोरायपाटन मांय वंदे गंगा जल पूजन महोत्सव मांय हिस्सो लेवण रो कार्यक्रम है। श्री शर्मा काले सुजानगंगा मांय दीपदान करेला। प्रदेश मांय काले ऊं वंदे गंगा जल संरक्षण-जन अभियान री सरूआत व्हे री है। इण री मार्फत प्रदेश मांय भूजल थर बधावण अर जल संचयन री खास ठौड़ां ने पाछा जीवत करण री मुहिम चलायी जायेला। 20 जून तांई चलाया जावण वाळा ईं अभियान मांय लोगां ने पाणी बचावण अर पाणी भेळा करण रो संदेश दियो जायेला। मुख्यमंत्री भजनलाल शर्मा प्रदेशवासियां ऊं ई पहल ऊं जुड़न री अरज करी है। राज्यपाल हरिभाऊ बागड़े बत्ती छायादार अर भरपूर ऑक्सीजन देवण वाळा पौधां लगावण माथे जोर दियो है। श्री बागड़े विश्व पर्यावरण दिवस री पैली सिंज्यां जयपुर मांय व्ही समिट मांय बोल रह्या हा। वणा दफ़्तरा, सार्वजनिक ठौड़ां माथे पेड़ लगावण अर वां री वाजिप देख-रेख करण री बात कही। जयपुर मांय बुधवार ने रन फॉर एन्वायरमेंट व्ही। वन राज्यमंत्री संजय शर्मा इण ने हरी झंडी दिखा र रवाना कर्या। इण ऊं पैला वणा प्रतिभागियां ने पर्यावरण संरक्षण री शपथ दीरायी। चूरू अर हनुमानगढ़ मांय ई पर्यावरण जागरुकता दौड़ री मार्फत लोगां ने प्रकृति संरक्षण रो संदेश दीरीज्यो।