विधानसभा रो पावस सत्र बेमियादी बगत सारू टाळ दियो ज्यो है। सत्र रा आखिरी दिन बुधवार ने मुख्यमंत्री भजनलाल शर्मा सदन मांय कह्यो के विधानसभा रो सत्र जनता री परेशानियां माथे ध्यान खींचण अर वां ने आगी करण सारू चर्चा करण बाबत् बुलायी ज्यो हो। वे विपख माथे सस्ती लोकप्रियता सारू सदन रो समय बर्बाद करण रो आरोप लगायो। श्री शर्मा कह्यो के सत्र रे दौरान विपख री ओर ऊं जनता रा भला ऊं जुड्यो कोई खास मुद्दो नी उठायी ज्यो। मुख्यमंत्री कह्यो के प्रदेश मांय घणी ज़ोरदार बिरखा रे कारण उपजा हालात इण रा असर वाळा लोगां ऊं मुलाकात सारू विपख रो कोई नेता जनता बीचे नी पूग्यो।
इण ऊं पैली विधानसभा मांय और कैमरा लगावण रा मामला माथे विपख रा सदस्य ज़ोरदार हंगामो कीनो अर विधानसभा अध्यक्ष ऊं लगातार ईं बारा मांय व्यवस्था देवण री मांग कीनी। ईं दौरान कांग्रेस रा केई विधायक वैल मांय आ र नारा लगावण लाग्या। ईं पाछे वे सदन री कार्यवाही मांय ई शामिल नी व्ह्या।
वन अर पर्यावरण मंत्री संजय शर्मा बुधवार ने विधानसभा मांय बतायो के बारां ज़िला मांय गैर-कानूनी तौर ऊं तेंदू पत्ता री तुड़ाई अर कटाई करण वाळां रे खिलाफ करड़ी कार्यवाही करी जावेला। वे कह्यो के वन विभाग रा कामकाज मांय भ्रष्टाचार अर कोताही बर्दाश्त नी करी जावेला। ईं दौरान वन मंत्री उप वन संरक्षक अनिल कुमार यादव ने राजकाज मांय लापरवाही अर अनुशासनहीनता करण रा आरोप मांय मुअत्तल करण रा हुकम दीना। वन मंत्री विधायक ललित मीना री ओर ऊं ध्यानाकर्षण प्रस्ताव रे मार्फ उठायी ज्या सवाल रो जवाब दे रह्या हा। वे कह्यो के उप वन संरक्षक यादव रे खि़लाफ जंगलात हलका री जमीं माथे गैर-कानूनी कब्जा अर कटाई री गंभीर शिकायतां मिली ही।