राष्ट्रपति द्रौपदी मुर्मू कह्यो है के स्वच्छता देश री सांस्कृतिक चेतना री बुनियाद है। वे स्वच्छ भारत मिशन रा तहत राज्यां अर केंद्र रा राज वाळा प्रदेशां री कोशिशां री सराहवणा करता थकां कह्यो के आ एक सफल पहल साबित व्ही है। राष्ट्रपति गुरूवार ने नई दिल्ली मांय राख्यी ज्या स्वच्छ सर्वेक्षण 2024-25 समारोह मांय बोल रही ही। स्वच्छ सर्वेक्षण मांय राजस्थान रा दो नगर निकायां ने ईनाम दे र नवाज़ी ज्या। नगर निगम जयपुर ग्रेटर ने स्टेट मिनिस्ट्रियल श्रेणी मांय देश मांय 16वी ठौड़ मिली जद के डूंगरपुर ने नान्हा शहरां री श्रेणी री सुपर स्वच्छ लीग मांय ईनाम दियो ज्यो। नगरीय विकास, स्वायत्त शासन अर आवासन मंत्री झाबर सिंह खर्रा ओ ईनाम लीनो। ईं मौके डूंगरपुर नगर परिषद रा सभापति अमृत कलासुआ अर आयुक्त सांवरमल आबासरा ई मौजूद हा। कार्यक्रम पाछे खबरनवीसां सागे बातचीत करता थकां श्री खर्रा कह्यो के जनता री मदद ऊं प्रदेश साफ-सफाई रा हलका मांय नुवी ऊचाइयां हासिल कर सके है। वे लोगां ऊं साफ-सफाई ने जनता रो आन्दोलन बणावण री अपील कीनी। राष्ट्रीय स्वच्छता सर्वेक्षण मांय डूंगरपुर ने लारला पांच साल ऊं लगातार न्यारी-न्यारी श्रेणियां मांय ईनाम दे र नवाज़ो जा रह्यो है। म्हाणा खबरनवीस बतायो के डूंगरपुर ने ओ ईनाम मिलण परां जनता घणी राज़ी है। शहर मांय साफ-सफाई ऊं जुड़्या केई नुवा काम करी ज्या है। नगर निगम जयपुर ग्रेटर ने ईं स्टेट मिनिस्टिरियल श्रेणी मांय ईनाम दियो ज्यो है। निगम पूरा देश मांय 16वीं ठौड़ हासिल कीनी। जयपुर ग्रेटर नगर निगम री महापौर सौम्या गुर्जर ओ ईनाम लीनो।