राज्य सरकार लारला बरसां मांय प्रमोशन रो फायदो नी लेवण वाळा कर्मचारियां रा प्रमोशन मांय दो साल री छूट देवेला। मुख्यमंत्री भजनलाल शर्मा री सदारत मांय सोमवार ने व्ही मंत्रिमंडल री मीटिंग मांय ओ फैसलो करी ज्यो। मीटिंग पाछे उपमुख्यमंत्री डॉ. प्रेमचंद बैरवा, कैबिनेट मंत्री जोगाराम पटेल अर सुमित गोदारा खबरनवीसां ने बतायो के मीटिंग मांय ऊर्जा, उद्योग, पर्यटन, नगरीय विकास, भणाई-लिखाई अर जमीं आवंटन ऊं जुड़्या केई खास फैसला करी ज्या। वे बतायो के कॉलेज अर यूनिवर्सिटी मांय यूजीसी रे नियमां रे मुजब सीसीए नियम मांय बदलाव ने ई मंजूरी दीरीजी। इण ऊं करियर एडवांस्ड स्कीम रा तैत शिक्षकां री पदोन्नति व्हे सकेला। श्री बैरवा बतायो के जल संसाधन विभाग रा सेवा नियमां मांय ई बदलाव करी ज्यो है अर अनुकंपा रा आधार ऊं नौकरी देवण रा मामलां मांय ई रियायत देवण रो फैसलो करी ज्यो है। खबनवीसां सागे बातचीत रे दौरान कैबिनेट मंत्री जोगाराम पटेल बतायो के मीटिंग मांय राजस्थान लोक सेवा आयोग मांय सदस्यां री तादाद 7 ऊं बधा र दस करण रो फैसलो ई करी ज्यो। ईं दौरान कैबिनेट मंत्री सुमित गोदारा बतायो के मीटिंग मांय राज्य ने मेडिकल टूरिज्म रा केन्द्र रा तौर ऊं विकसित करण रो फैसलो ई करी ज्यो। मंत्रिमण्डल री मीटिंग मांय प्रदेश री टाउनशिप नीति, मेडिकल वेल्यू ट्रेवल पॉलिसी – हील इन राजस्थान नीति, राजस्थान निवेश संवर्धन योजना अर राजस्थान सिटी गैस डिस्ट्रीब्यूशन नीति ने ई मंजूरी दीरीजी। मंत्री बतायो के ईं सारू राज्य स्तर री निगरानी कमेटी बणावण रो फैसलो ई करी ज्यो।