राज्य री मौजूदा विधानसभा रो चौथो सत्र सोमवार ने सरु व्ह्यो। इण री सरूआत भारी हंगामा अर पख-विपख रा सदस्यां कानी ऊं एक-दूजा माथे आरोप लगावण सागे व्ही। विधानसभा अध्यक्ष वासुदेव देवनानी विपख रा सदस्यां कानी ऊं करी ज्या शोर-शराबा माथे नाराज़गी जताता थकां कह्यो के सदन रो मान बणायो राख्यो जावणो चाहिजे। सदन मांय विपख रा नेता टीकाराम जूली सत्ता पख माथे लोकसभा अर विधानसभा चुनाव मांय वोट चोरी रो आरोप मांड्यो अर तख्तियां लहराई। खबरनवीसां सागे बातचीत करता थकां श्री जूली कह्यो के सदन मांय विपख री आवाज़ दबायी जा रही है। संसदीय कार्यमंत्री जोगाराम पटेल खबरनवीसां सागे बातचीत करता थकां विपख रा रवैया री निंदा करता थकां कह्यो के विपख रा सदस्य सदन री मर्यादा भंग कीनी है। हंगामा बीचे ही जीएसटी द्वितीय संशोधन बिल 2025, राजस्थान कारखाना संशोधन बिल, 2025 अर राजस्थान स्वास्थ्य विज्ञान विश्वविद्यालय अध्यादेश 2025 सदन सामी पेश करी ज्या। ईं रे अलावा राजस्थान कोचिंग सेंटर नियंत्रण अर विनियमन बिल 2025 ओजू सदन मांय पेश करी ज्यो। ओ बिल लारला सत्र मांय पेश करी ज्यो हो, जिण ने प्रवर समिति ने भेज दियो ज्यो हो। चौथा सत्र रा पहला दिन लारला दिनां देवलोक व्ह्या खास लोगां, आतंकी हमला, विमान हादसा अर कुदरती आपदावां रे कारण मरण वाळां ने मौन राख र सिरधाभाव सागे याद करी ज्या। ईं पाछे विधानसभा री कार्रवाई बुधवार तांई टाल दीरीजी।